ജനകീയ ഭരണം

വെള്ളവും വെളിച്ചവും വേയ്സ്റ്റാക്കുന്നവർ

വെള്ളവും വെളിച്ചവും വേയ്സ്റ്റാക്കുന്നവർ എന്ന കഴിഞ്ഞാഴ്ചയിലെ പോസ്റ്റിനെക്കുറിച്ച് ചിത്രങ്ങളില്ല എന്നു ചിലരെല്ലാം പരാതി പറഞ്ഞു. നമുക്കു ബ്ലോഗ്സ്പോട്ട് അനുവധിച്ച 100 എം.ബി. സ്പേസ് പെട്ടെന്നു ചെലവാകേണ്ടെന്നു കരുതിയാണ് ചിത്രങ്ങൾ ഒന്നുവീതമായി നിയന്ത്രിച്ചതും വീഡിയോ പരിപൂർണമായി വേണ്ടെന്നു വച്ചതും. എങ്കിലും വായനക്കാരുടെ അഭ്യർത്ഥന മാനിച്ച് രണ്ടുമൂന്നു ചിത്രങ്ങൾ ഇത്തവണ പോസ്റ്റു ചെയ്യുകയാണ്. 

വെള്ളം

മേലൂർ കുന്നു ചർക്കയ്ക്കു മുമ്പുള്ള കനാലിലേക്കിറഞ്ഞുന്ന ഭാഗത്തുള്ള റോഡരികിലെ ടാപ്പാണിത്. വളരെ നാളുകളായി ഇതു തന്നെയാണു സ്ഥിതി.

ജലസംഭരണികൾ

ഏതാനും വർഷങ്ങൾക്കു മുമ്പു വരെ കേരളോത്സവത്തിലേ നീന്തൽ മത്സരങ്ങൾ നടത്തിയ പ്രസിദ്ധമായ പഞ്ചായത്തു വക നെടുമ്പാച്ചിറയാണിത്. ഇപ്പോൾ ഇതു സമ്പൂർണമായി അവഗണിക്കപ്പെട്ടിരിക്കുന്നു. ചിറക്കപ്പുറം കാണുന്ന റബ്ബർ മരങ്ങൾ പാടം നികത്തിയെടുത്ത് വച്ചതാണ്. പാടം നികത്തിയ കാലത്ത് അതിനെതിരെ നടപടിയുണ്ടാകുമെന്ന് അന്നത്തെ വില്ലേജ് ആഫീസർ പരസ്യമായി പ്രഖ്യാപിച്ചതാണ്. അതെല്ലാം പാഴ്വാക്കായി. വളർന്നു വെട്ടാൻ പാകത്തിൽ നിൽക്കുന്ന റബ്ബർ വെട്ടിക്കളയുന്നത് കർഷകനും തീരാവേദനയാകും. വേണ്ടസമയത്ത് അധികാരപ്പെട്ടവർ നടപടി സ്വീകരിക്കാത്തതിന്റെ മറ്റൊരു ഉത്തമോദാഹരണം.

 

വൈദ്യുതി

 ഒരു മാസത്തോളമായി കുവക്കാട്ടുകുന്നിൽ പൊട്ടിക്കിടക്കുന്ന വൈദ്യുത കമ്പിയാണിത്. ഇതു നന്നാക്കാനോ പൊട്ടിയ കമ്പികൾ നീക്കം ചെയ്യാനോ കെ.എസ്.ഇ.ബി. അധികൃതർ ഇതുവരെ തയ്യാറായിട്ടില്ല. ആഫീസിൽ അന്വേഷിച്ചപ്പോൾ ലഭിച്ച വിവരം അവിടെ ലൈൻ മാൻ ഇല്ലെന്നും ഇപ്പോൾ ആ കമ്പികൾ ഉപയോഗിച്ച് ആർക്കും വൈദ്യുത കണക്ഷൻ നൽകുന്നില്ലെന്നുമാണ്. അങ്ങനെയാണെങ്കിൽ പോലും അലുമിനിയം കമ്പി വിലയുള്ള ഒരു സാധനമാണ്. അതു നഷ്ടപ്പെടാതെ സൂക്ഷിക്കാനും ആവശ്യമെങ്കിൽ ലേലം ചെയ്തു വിൽക്കാനും കെ.എസ്.ഇ.ബി.യുടെ ബന്ധപ്പെട്ട എഞ്ചിനീയർക്കു ചുമതലയുണ്ട്. അത്രതന്നെ അലപനീയമാണ് ലൈന്മാൻ മാരുടെ പോസ്റ്റ് ഒഴിവാക്കിയിടുന്ന കെ.എസ്.ഇ.ബി.യുടെ നയവും.