പ്ലാസ്റ്റിക് വിമുക്തമായ ഒരു വാർഡ് യാഥാർത്ഥ്യമാക്കാനാകുമോ?

ഗുരുതരമായ മാലിന്യ പ്രശ്നങ്ങളുയർത്തുന്ന പ്ലാസ്റ്റിക്കിന്റെ ഉപഭോഗം ഘട്ടം ഘട്ടമായി കുറച്ചു കൊണ്ടു വരേണ്ടത് കാലഘട്ടത്തിന്റെ ആവശ്യമാണ്. അതിന്റെ ആദ്യ പടിയായി ഒരു ഗ്രാമ പഞ്ചായത്തിന്റെ ഒരു വാർഡെങ്കിലും പ്ലാസ്റ്റിക് മാലിന്യ വിമുക്തമാക്കാനായാൽ അതൊരു മുന്നേറ്റമായിരിക്കും. ഇക്കാര്യത്തിൽ ഓരോ വായനക്കാരന്റേയും നിർദ്ദേശങ്ങൾ ക്ഷണിക്കുന്നു. നിർദ്ദേശങ്ങൾ സമാഹരിച്ച് ഫെബ്രുവരി മാസത്തിൽ ഒരു കരടു പ്രവർത്തന പദ്ധതി തയ്യാറാക്കാൻ ശ്രമിക്കുന്നതാണ്.

എഡിറ്റർ

നിർദ്ദേശങ്ങൾ അയയ്ക്കേണ്ട വിലാസം jeevabindu@mail.com

ഇന്നത്തെ ചിത്രം

മേലൂർ പുഷ്പഗിരി അടിച്ചിലി റോഡു പണി തുടങ്ങിയപ്പോൾ തന്നെ ജനങ്ങളുടെ ആശങ്കകളും ആരംഭിച്ചു. മതിയായ സാങ്കേതിക സൌകര്യമോ എഞ്ചിനീയർമാരുടെ സാന്നിദ്ധ്യമോ ഇല്ലാതെ നടത്തുന്ന ഈ പണി കഴിഞ്ഞ് റോഡ് എത്രനാൾ നിലനിൽക്കും? ജനം വരാനിരിക്കുന്ന കുഴികളിൽ വാഴ നടാൻ തയ്യാറായി കഴിഞ്ഞു. ഏതു കൊടിക്കു കീഴിൽ എന്നേ സംശയമുള്ളൂ.

ജനകീയ ഭരണം

മേലൂർ സർവീസ് സഹകരണ ബാങ്ക് കോർ ബാങ്കിങ്ങിലേക്ക്

മേലൂർ സർവീസ് സഹകരണ ബാങ്ക് കോർ ബാങ്കിങ് സംവിധാനത്തിലേയ്ക്ക് നീങ്ങുന്നതിന്റെ ഭാഗമായി ബാങ്കു കെട്ടിടത്തിന്റെ മുകളിൽ ടവർ പണിയുന്നു. ടവറിന്റെ തുഞ്ചത്ത് നിൽക്കുന്ന മനുഷ്യൻ ഒരു സാധാരണക്കാരനായ മേലൂർക്കാരൻ തന്നെ ആയിരിക്കുമോ? 

 

മേലൂർ പുഷ്പഗിരി അടിച്ചിലി റോഡു പണി പുരോഗമിക്കുന്നു

മേലൂർ പുഷ്പഗിരി അടിച്ചിലി റോഡു പണി ഒച്ചിഴയുന്നതു പോലെ പുരോഗമിക്കുന്നുണ്ട്. ഗതാഗത നിയന്ത്രണം ആരംഭിച്ചിട്ട് ആഴ്ചകളായി. ഇനിയും ഏതാനും മാസങ്ങൾ കൊണ്ടേ പണി പൂർത്തിയാക്കാനാകൂ എന്നാണ് കരുതപ്പെടുന്നത്. 

ഈ അവഗണന എന്നു തീരും

പതിനാറു വർഷമായി അറ്റകുറ്റപ്പണി നടത്താത്ത കുഞ്ഞമ്പലം കരിങ്ങാമ്പിള്ളി പിണ്ടാണി റോഡിന്റെ ഇപ്പോളത്തെ സ്ഥിതി. ഈ റോഡിന്റെ ഏതാനും ഭാഗം മാത്രം അറ്റകുറ്റപ്പണി നടന്നിട്ടുണ്ട്. പൂർണമായും അറ്റകുറ്റപ്പണികൾ നടത്തുന്നതിനു ഇനിയെത്ര നാൾ കൂടി കാത്തിരിക്കണം?

തൃശ്ശൂർ ജില്ലാ ജിയോളജിസ്റ്റിനെ ജോലിസമയത്ത് ബാറിൽ നിന്നു പിടികൂടി

മണ്ണ് മണൽ ക്വാറി മേഖലകൾ കൈകാര്യം ചെയ്യുന്ന തൃശ്ശൂർ ജില്ലാ ജിയോളജിസ്റ്റിനെ ചെമ്പൂക്കാവിലെ ആഫീസിനടുത്തുള്ള ബാറിൽ നിന്നു വിജിലൻസ് പിടികൂടി. മദ്യപിച്ച നിലയിൽ കണ്ടെത്തിയ ഇദ്ദേഹത്തെ ജാമ്യത്തിൽ വിട്ടയച്ചു. അദ്ദേഹത്തെ സസ്പെന്റ് ചെയ്യാൻ വിജിലൻസ് ഡയറക്ടർക്ക് ശുപാർശ പോയിട്ടുമുണ്ടെന്ന് അറിയുന്നു.

കറന്റ് പോയാൽ എസ്.എം.എസ്., ഒറ്റുകാർക്ക് പാരിതോഷികം

കെ.എസ്.ഇ.ബി. ടോൾ ഫ്രീ ട്രബിൾ കോൾ മാനേജ്മെന്റ് റൂം തുറന്നു. കറന്റ് പോയാൽ ഇനി മുതൽ KSEB <space> Section Code <space> Consumer No. എന്ന ഫോർമാറ്റിൽ 537252 എന്ന നമ്പറിലേക്ക് എസ്.എം.എസ്. ചെയ്താൽ മതി. ഇതു സംബന്ധിച്ച് മേലൂർ കെ.എസ്.ഇ.ബി. ഓഫീസിലെ സെക്ഷൻ കോഡ് എന്തെന്നു അവിടെ അന്വേഷിച്ചപ്പോൾ അറിയില്ലെന്നും അന്വേഷിച്ചു പറയാമെന്നുമായിരുന്നു ഉത്തരം. പക്ഷേ അതു കേട്ട് വിഷമിക്കേണ്ടതില്ല. നിങ്ങളുടെ കറന്റ് ബില്ല് ഒന്നു എടുത്ത് നോക്കൂ. ആദ്യ കോളത്തിൽ തന്നെ സെക്ഷൻ എന്നിടത്ത് സെക്ഷൻ കോഡ് നൽകിയിട്ടുണ്ടാകും. തൊട്ടു താഴെ കൺസ്യൂമർ നമ്പറുമുണ്ടാകും. കൺസ്യൂമർ നമ്പർ മീറ്ററിനടുത്തും കാണും. മേലൂർ സെക്ഷന്റെ കോഡ് 5650 ആണ്.

പുതുതായി ആവിഷ്കരിച്ച രീതി പ്രകാരം എസ്.എം.എസായി ഒരു പരാതി ലഭിച്ചു കഴിഞ്ഞാൽ കെ.എസ്.ഇ.ബി.യുടെ സെർവർ കമ്പ്യൂട്ടറിൽ നിന്നും ഒരു രജിസ്റ്റർ നമ്പർ ഉപഭോക്താവിന്റെ മൊബൈൽ ഫോണിലേയ്ക്ക് എസ്.എം.എസ് ആയി തന്നെ അയക്കുന്നു. അപ്പോൾ തന്നെ ഈ വിവരം അതാത് സെക്ഷൻ ഓഫീസിന്റെ കമ്പ്യൂട്ടറിലും ലഭ്യമാകുമത്രേ. അതാതു സെക്ഷൻ ഓഫീസിലെ ബന്ധപ്പെട്ട ഉദ്യോഗസ്ഥന്റെ മൊബൈൽ ഫോണിലും വിവരം ലഭ്യമാകും. പരാതി പരിഹരിച്ച ശേഷം അക്കാര്യം ഉപഭോക്താവിന്റെ മൊബൈൽ ഫോണിലേയ്ക്ക് എസ്.എം.എസ്. ആയി അയയ്ക്കാനും സംവിധാനമുണ്ട്.

ഉപഭോക്താവിനു പിന്നെയും പരാതി ബാക്കിയുണ്ടെങ്കിൽ 155333 എന്ന ടോൾ ഫ്രീ നമ്പറുമായും ബന്ധപ്പെടാവുന്നതാണ്. അവിടന്നും നീതി ലഭിക്കാത്തപക്ഷം അതേ നമ്പറിൽ തന്നെ പിന്നെ എവിടെ പരാതിപ്പെടണമെന്നു ചോദിക്കാമല്ലോ.

എങ്കിലും പരാതിപ്പെടേണ്ട 537252 എന്ന നമ്പറോ 155333 എന്ന നമ്പറോ നിലവിലില്ല എന്നു ടെലഫോൺ ഡിപ്പാർട്ടുമെന്റുകാർ പറഞ്ഞാലും ഞെട്ടേണ്ടതില്ല. കെ.എസ്.ഇ.ബി. എല്ലാം ശരിയാക്കി വരുന്ന കൂട്ടത്തിൽ ഇതും ശരിയാക്കും. എന്തായാലും ഒന്നു പരീക്ഷിച്ചു നോക്കൂ.

ഇനി പ്രവർത്തിക്കുന്ന ഒരു നമ്പറാകട്ടെ. തൃശ്ശൂർ ജില്ലയിലെ വൈദ്യുതി മോഷണത്തെക്കുറിച്ച് 0484 2621062 എന്ന നമ്പറിലോ 9446008482 എന്ന നമ്പറിലോ അറിയിച്ചാൽ പാരിതോഷികം ലഭിച്ചേക്കാം.