ഇന്നത്തെ ചിത്രം

ജീവന്റെ ലാസ്യനൃത്തവുമായി ഒരു ഇലക്കൂമ്പ് പിറവിയെടുക്കുന്നു

ഫോട്ടോ : ശരത് കെ. ശശി

ഗമ കാണിക്കാൻ യമഹ ആർ.വൺ.ഫൈവ് വേർഷൻ 2.0.

ശരത് കെ. ശശി

യമഹ! ഈ പേര് കേട്ടാൽതന്നെ വീട്ടിൽ എക്സ്പൈറി ഡെയ്റ്റ് കഴിഞ്ഞ് മുകളിലേക്കുള്ള വണ്ടിയും കാത്തിരിക്കുന്ന അപ്പൂപ്പന്മാരുടെ മുഖത്തും ഒരു പുഞ്ചിരി കാണാം. കാരണം മറ്റൊന്നുമല്ല, ഫ്ലാഷ്ബാക്ക് ഓർത്തുതന്നെ. അന്നത്തെ കാലത്ത് കാമുകിയുടെ (ഇപ്പോഴത്തേ അമ്മൂമ്മയുടെ) മുൻപിൽ ബൈക്കിൽ അഭ്യാസങ്ങൾ കാണിച്ച് ഷൈൻ ചെയ്യാനും യമഹ തന്നെ വേണമായിരുന്നു. ഇപ്പോൾ കാലം മാറി. ഒപ്പം യമഹയും. യമഹയുടെ ഇപ്പോഴത്തെ ശ്രദ്ധ സൂപ്പർബൈക്കുകൾക്കിടയിലാണ്. അതിന്റെ വലിയ ഒരു തെളിവാണ് ആർ.വൺ.ഫൈവ് വേർഷൻ 2.0. അങ്ങനെയാണെങ്കിൽ ആ തെളിവ് ഒന്ന് വിസ്തരിച്ച് കളയാം, അല്ലേ?

എൻജിൻ

രോഷാകുലനായ ഹെഡ്ലാമ്പ്, കരുത്തുറ്റ ബോഡി, എന്തിനേയും വെല്ലുന്ന ഫ്രെയിം, ഇതെല്ലാം കണ്ടാലുണ്ടല്ലോ, ഏതു കൊലകൊമ്പൻ പോലും ഒന്നു വിറക്കും. അങ്ങനെയെങ്കിൽ തുടങ്ങാം 8500 ആർ.പി.എമ്മിൽ 17പി.എസ്. ആണ് ഇഷ്ടന്റെ കരുത്ത്. ടോർക്ക് 7500 ആർ.പി.എമ്മിൽ 15എൻ.എം ആണ്. ലിക്യിഡ് കൂൾഡ് 4 – സ്ട്രോക്ക്, എസ്.ഒ.എച്ച്.സി. 4- വാൽവ് എൻജിൻ ഉള്ള ആർ. വൺ. ഫൈവിന് 149.8സി.സി ഡിസ്പ്ലേസ്മെന്റും കൂടി കിട്ടുമ്പോൾ മോനേ മുട്ടാൻ നിക്കണ്ട പണി കിട്ടും. ബോർ*സ്ട്രോക്ക് 57*58.7എം.എം ഉള്ള ഇഷ്ടന്റെ കമ്പ്രഷൻ റേഷ്യോ 10.4:1 ആണ് (സി.ബി.ആർ 250 ആർ 10.7:1). വെറ്റ് സമ്പ് ആണ് ഇദ്ദേഹത്തിന്റെs ലൂബ്രിക്കേഷൻ. ഇലക്ട്രിക്ക് സ്റ്റാർട്ടാണ് സ്റ്റാർട്ടിംഗ് മെത്തേഡ്. ഇത് വെറും ട്രയൽ മാത്രം, ഇനിയും ധൈര്യമുണ്ടെങ്കിൽ താഴോട്ടു വായിച്ചോളൂ.

ഡ്രൈവ് ട്രൈൻ

6 സ്പീഡ് റിട്ടേൺ ടൈപ്പ് ട്രാൻസ്മിഷൻ ഉള്ള ആർ.വൺ. ഫൈവിന്റെ ഗിയർ റേഷ്യോസ്  ഫസ്റ്റ് 2.833, സെക്കന്റ് 1.875, തേഡ്1.364, ഫോർത്ത്1.143, ഫിഫ്ത്ത്0.957, സിക്സ്ത്ത്0.84 എന്നിങ്ങനെയാണ്. വെറ്റ്, മൾട്ടി പ്ലി-ഡിസ്ക്ക് എന്നിങ്ങനെയാണ് ക്ലച്ച് ടൈപ്പ്.

ഡൈമെൻഷൻസ്

136 കിലോഗ്രാം കെർബ് വെയിറ്റുള്ള ആർ. വൺ. ഫൈവിന്റെ ഓവറോൾ ലെംഗ്ത്ത് 1970 മില്ലീമീറ്ററും വിഡ്ത്ത് 670 മില്ലീമീറ്ററും ഹൈറ്റ് 1070 മില്ലീമീറ്ററും ആണ്. നല്ല തോതിൽ ഗ്രിപ്പും സ്റ്റെബിലിറ്റിയും നൽകുന്ന ഇദ്ദേഹത്തിന്റെ ടയർ സൈസ് ഫ്രണ്ട് 90/80-17ഉം റിയർ 130/70-ആർ 17ഉം ആണ്. 1345 ആണ്. വീൽബേസ്. ഹാവൂ! ആനക്ക് മലയാളം അറിയാത്തത് വളരെ നന്നായി. കൊമ്പനാണെന്ന് പറഞ്ഞിട്ട് കാര്യമില്ല. വിറയ്ക്കുക മാത്രമല്ല മുള്ളുക വരെ ചെയ്തേനെ.

ചേസ്സിസ്.

സിങ്കിൾ സിലിണ്ടർ ആണ് സിലിണ്ടർ ലേയൌട്ട്. സസ്പെൻഷൻ ഫ്രണ്ട് ടെലസ്കോപിക്കും റിയർ ലിങ്ക്ഡ് ടൈപ്പ് മോണോക്രോസും ആണ്. ഇദ്ദേഹത്തിന്റെ കാസ്റ്റർ/ട്രയൽ 26⁰/98 മില്ലീമീറ്റർ ആണ്. ഫ്രണ്ട്/റിയർ ഹൈഡ്രോളിക്ക്, സിങ്കിൾ ബോക്സ് എന്നിങ്ങനെയാണ് ബ്രേക്കിംഗ് സിസ്റ്റം.

ഇലക്ട്രിക്കലും മറ്റുള്ളവയും

ടി.സി.ഐ ഇഗ്നീഷൻ ഉള്ള ആർസ്സ്സ്. വൺ. ഫയ്‌വിന്റെ ഫ്യുവൽ സപ്ലെ ഫ്യുവൽ ഇൻജക്ഷൻ ആണ്. 12വോൾട്ട്, 3.5എ.എച്ച് (10എച്ച്) ബാറ്ററിയാണ് യമഹ ആർ. വൺ. ഫൈവിന് നൽകിയിരിക്കുന്നത്. മുമ്പ് പറഞ്ഞതുപോലെ രോഷാകുലനായ ഹെഡ്ലാമ്പിന് ലോ ഭീം 12 വോൾട്ട്/35 വാട്ട്സ്*1ഉം ഹൈ ഭീം12 വോൾട്ട്/35 വാട്ട്സ്*2ഉം ആണ്. റിഡക്ഷൻ റെഷ്യോ പ്രൈമറി 3.042 സെക്കന്ററി 3.13 എന്നിങ്ങനെയാണ്.  എയ്റോഡൈനാമിക് ഷേപ്പിനെ എടുത്ത് കാണിക്കുന്ന ആർ. വൺ. ഫൈവിന്റെ സൈഡ്കൌളുകൾ സ്പോർട്ടി ലുക്കിനൊപ്പം പൌരുഷവും പ്രകടിപ്പിക്കുന്നു. ഇനി വേർഷൻ 2.0 യിൽ വരുത്തിയിരിക്കുന്ന മാറ്റങ്ങളെക്കുറിച്ച് ഒന്ന് നോക്കാം. ഹെഡ്ലാമ്പ്, സീറ്റ്, സൈഡ്കൌൾ, അലൂമിനിയം സ്വിംഗ്രം എന്നിവ ചെറുതായി ഒന്ന് മാറ്റിയിട്ടുണ്ട്. സൈഡ്കൌൾ ആദ്യത്തേതിൽനിന്നും ചെറിയ തോതിൽ വത്യാസപ്പെടുത്തിയിരിക്കുന്നു. ഫ്രണ്ടിലെ ടേൺ ഇന്റിക്കേറ്ററുകൾ കുറച്ചുകൂടി താഴ്ത്തിവച്ചിരിക്കുന്നു. ഒന്നിച്ചിരുന്ന സീറ്റിനെ വേർഷൻ 2.0ൽ രണ്ടായി സ്പ്ലിറ്റ് ചെയ്തിട്ടുണ്ട്. കൂടാതെ മുമ്പത്തേതിൽ നിന്നും വളരെ വത്യസ്തമായ എൽ.ഇ.ഡി ടെയിൽ ലാമ്പാണ് വേർഷൻ 2.0ൽ ഉപയോഗിച്ചിരിക്കുന്നത്. ഔട്ട്സ്റ്റാന്റിംഗ് റിയർ ടൈപ്പ് ട്രാക്ഷന് വേണ്ടി ലോംഗ് അലൂമിനിയം സ്വിംഗ്രം ആണ് യമഹ ആർ. വൺ. ഫൈവിന് കൊടുത്തിരിക്കുന്നത്. ആദ്യത്തേതിൽനിന്നും വത്യസ്തമായ ഡിസൈനിലാണ് അലോയ്സ് എത്തുന്നത്. ലിക്വിഡ് കൂൾഡ് എൻജിൻ ഹൈ ടെമ്പറേച്ചറിലും ഗുഡ് പെർഫോമൻസ് നൽകുന്നു.160മില്ലിമീറ്റർ ഗ്രൌണ്ട് ക്ലിയറൻസ് ഉള്ള ആർ. വൺ. ഫൈവിന്റെ സീറ്റ് ഹൈറ്റ് 800 മില്ലീ മീറ്റർ ആണ്. ഇത്രയും ഒക്കെ കാട്ടിക്കൂട്ടിയിട്ടും സാമാന്യം തരക്കേടില്ലാത്ത 40-45 മൈലേജ് തന്നെയാണ് ആർ. വൺ. ഫൈവിന് കമ്പനി വാഗ്ദാനം ചെയ്യുന്നത്. ഫ്യൂവൽ ടാങ്ക് വോളിയം 12 ലിറ്റർ ആണ്. മലയാളം മനസ്സിലായില്ലെങ്കിലും ആനക്ക് എന്തൊക്കെയോ മനസ്സിലായി എന്നു തോന്നുന്നു, ഇനി പുള്ളിയെ മഷിയിട്ട് നോക്കിയാൽ പോലും കിട്ടുകയില്ല. ആന പോണെങ്കിൽ പോകട്ടെ അവസാനത്തെ ഒരു ചടങ്ങു കൂടിയുണ്ട്. ഇത്രയും കേട്ട സ്ഥിതിക്ക് അതുംകൂടി കേൾക്കാനുള്ള ധൈര്യം കൂടി കാണിചുകൂടേ? മറ്റൊന്നുമല്ല വില തന്നെയാണ്. ഈ ധീരന്റെ എക്സ് ഷോറൂം വില 107990 ആണ്. ഇടഞ്ഞ ആനയെ തളക്കാനുള്ള സൂത്രമൊക്കെ ഇപ്പോൾ പിടികിട്ടിക്കാണും അല്ലേ? ഇപ്പോഴത്തെ അപ്പൂപ്പന്മാർ പണ്ടുകാലം മുതൽ ഉപയോഗിച്ചു പോന്നതുകൊണ്ട് പാരമ്പര്യവും കൊമ്പനെ വിറപ്പിക്കുന്നതിനാൽ പൌരുഷവും ഈ ചുണക്കുട്ടനുണ്ട്. ഇതിനെ ഇന്നത്തെ കാമുകന്മാരുടെ ഭാഷയിൽ പറഞ്ഞാൽ റൂട്ട് ക്ലീൻ. മനസ്സിലായില്ല അല്ലേ? കാമുകിമാർക്ക് ആങ്ങളമാരുണ്ടെങ്കിൽ ഇനിമുതൽ പേടിക്കേണ്ട എന്നർത്ഥം.

ചെറുപ്പക്കാർ ഇഷ്ടപ്പെടുന്ന ചെറുപ്പക്കാരൻ

ശരത് കെ. ശശി

സ്പോർട്ടി ലുക്ക്, കിടിലൻ പെർഫോർമൻസ്, തകർപ്പൻ മൈലേജ് എന്നിങ്ങനെ വിവിധ സവിശേഷതകളോടു കൂടിയ ഒരു ബൈക്ക് ഇന്നു സ്വപ്നത്തിൽ മാത്രമേ കാണാൻ കഴിയുകയുള്ളൂ! ഒന്നു നിൽക്കിഷ്ടാ, കാടുകേറി ചിന്തിക്കാൻ വരട്ടെ, ഇനി അങ്ങനെ ഒരു ബൈക്ക് ഉണ്ടെങ്കിലോ? ഉണ്ടെങ്കിലോ എന്നല്ല, ഉണ്ട്, ട്വിസ്റ്റർ -  സി.ബി.ട്വിസ്റ്റർ. കേൾക്കുമ്പോൽ നുണ പോലെയേ തോന്നുകയുള്ളൂ. പുള്ളിയെ നേരിൽ കണ്ടാലോ, വായും പൊളിച്ചു നിന്നുപോകും. ഈ സമയത്ത് മുല്ലപ്പെരിയാർ പൊട്ടി തൊട്ടു മുമ്പിൽ എത്തിയാൽ പോലും നിങ്ങൾ അറിയുകയില്ല. ഇങ്ങനെയുള്ള ഈ ധീരന്റെ നിർമ്മാതാവ് മറ്റാരുമല്ല, ഹോണ്ട തന്നെയാണ്. ഇപ്പോൾ ഇദ്ദേഹത്തെക്കുറിച്ച് കൂടുതൽ അറിയണം എന്നുണ്ടാകും അല്ലേ, എങ്കിൽ വായിച്ചു തുടങ്ങിക്കോളൂ.

 

എഞ്ചിൻ

ഒറ്റ നോട്ടത്തിൽ ഒരു സൂപ്പർ ബൈക്ക് ആണെന്നേ തോന്നുകയുള്ളൂ. പക്ഷേ ആളൊരു പാവമാണു കേട്ടോ. ഫോർ സ്ട്രോക്ക്, എയർ കൂൾഡ്, എസ്.ഐ എഞ്ചിൻ ആണ് ഹോണ്ട സി.ബി.ട്വിസ്റ്ററിനു നൽകിയിരിക്കുന്നത്. 150 സി.സി.യാണ് ഡിസ്പ്ലേസ്മെന്റ്. 8000 അർ. പി. എമ്മിൽ 9 ബി.എച്ച്. പി യാണ് ഇദ്ദേഹത്തിന്റെ കരുത്ത്. ടോർക്ക് 6000 ആർ. പി. എമ്മിൽ 9 എൻ.എം. മെയിന്റനൻസ് കുറയ്ക്കുന്നതിനു വേണ്ടി വിസ്ക്കസ് പേപ്പർ എയർ ഫിൽറ്ററാണു സി.ബി.ട്വിസ്റ്ററിനുള്ളത്. കിക്ക് വിത് സെൽഫ്, കിക്ക് (ഓപ്ഷണൽ) എന്നിങ്ങനെയാണ് ട്വിസ്റ്ററിന്റെ സ്റ്റാർട്ടിങ്ങ് സിസ്റ്റം. നാലു സ്പീഡ് ഗിയറുകളുള്ള ട്വിസ്റ്ററിനു വൺ ഡൌൺ ത്രീ അപ് എന്നിങ്ങനെയാണ് ട്രാൻസ്മിഷൻ. ആളു വിചാരിച്ച പോലെയല്ല, അല്ലേ?

ഡൈമെൻഷൻസ്

ചെറുപ്പക്കാർക്കു വേണ്ടി എത്തിയ ഈ ചെറുപ്പക്കാരനു ചെറുപ്പക്കാർ നൽകിയത് ഇൻഡ്യൻ ബൈക്ക് ഓഫ് ദി ഇയർ (2011) പുരസ്കാരം ആണ്. 108 കിലോഗ്രാം കെർബ് വെയ്റ്റുള്ള ഇദ്ദേഹത്തിന്റെ ലെങ്ത് 1972 മില്ലീമീറ്ററും വിഡ്ത് 742 മില്ലീമീറ്ററും ഉയരം 1075 മില്ലീമീറ്ററും ആണ്. വീൽ ബേസ് 1262 മില്ലീമീറ്ററുള്ള ട്വിസ്റ്ററിന്റെ ഗ്രൌണ്ട് ക്ലിയറൻസ് 180 മില്ലീമീറ്ററാണ്. 8 ലിറ്ററാണ് ഇദ്ദേഹത്തിന്റെ ഫ്യൂവൽ ടാങ്ക് കപ്പാസിറ്റി. 1.300 ലിറ്ററാണു റിസർവ്. 

ചേസിസ്

ആഡ്വാൻസ്ഡ് ഡിസൈൻ ഡയമണ്ട്, ട്വിൻ പൈപ്പ് ടൈപ്പ് എന്നിങ്ങനെയാണ് ചേസിസ്. ഫ്രണ്ട് ടെലസ്കോപ്പിക് ഫോർക്കും റിയർ സ്പ്രിങ് ലോഡഡ് ഹൈഡ്രോളിക് ഷോക്ക് അബ്സോർബർ വിത് റെക്ടാങ്കുലർ ബോക്സ് ടൈപ്പ് സ്വിങ് ആമും ആണ് സസ്പെൻഷൻ. ഫ്രണ്ടും റിയറും ട്യൂബ് ലെസ്സ് ടയറുകളാണ്. 70/100-17/എം/സി 40 പി ഫ്രണ്ടും 80/100-17/എം/സി 53 പി റിയറും ആണ്. ഫ്രണ്ട് 240 മില്ലീമീറ്റർ ഡയാ ഡിസ്കും റിയർ 110 മില്ലീമീറ്റർ ഡയാ ഡ്രമ്മും ആണ് ട്വിസ്റ്ററിന്റെ ബ്രേക്കിങ്ങ് സിസ്റ്റം. അങ്ങനെ ചെറുപ്പക്കാരുടെ ഇടയിൽ സ്ഥാനം പിടിച്ച ഇദ്ദേഹത്തിന്റെ സാഹസങ്ങളിൽ കുറച്ച് മുകളിൽ വായിച്ചില്ലേ? ഇനി താഴോട്ടു വായിച്ചോളൂ. ബാക്കിയെല്ലാം വഴിയേ മനസ്സിലാക്കാം.

ഇലക്ട്രിക്കലും മറ്റുള്ളവയും.

ഡി.സി. സി.ഡി.ഐ. ഇഗ്നീഷൻ ആണ് ഹോണ്ട സി.ബി. ട്വിസ്റ്ററിനു നൽകിയിരിക്കുന്നത്. ബാറ്ററി 12 വോൾട്ട്, 3.0 ഏ. എച്ച് മെയിന്റനൻസ് ഫ്രീ ആണ്. ഹാലൊജൻ 12 വോൾട്ട് 35/35 വാട്ട് ഹെഡ് ലാമ്പാണ് ഹോണ്ട ഇതിൽ ഉപയോഗിച്ചിരിക്കുന്നത്. മികച്ച പെർഫോർമൻസ് നൽകുന്നതും സൌന്ദര്യം വർദ്ധിപ്പിക്കുന്നതുമായ സ്ക്രീൻലെസ്സ് ഫ്രണ്ട് കൌൾ ട്വിസ്റ്ററിനു പുതിയ തലമുറയുടെ സ്റ്റൈൽ നൽകുന്നു. ഇതിന്റെ എയറോഡൈനാമിസം വെളിപ്പെടുത്തുന്നതിൽ മറ്റൊരു പങ്ക് സൈഡ് കൌളുകൾക്കാണ്. ഇവ ട്വിസ്റ്ററിന് ഒരു സ്പോർട്ടി ലുക്ക് നൽകുന്നു. ബോഡി ഡിസൈനിൽ ഫ്യൂവൽ ടാങ്കിന്റെ ഡിസൈൻ ട്വിസ്റ്ററിന്റെ ശക്തി വെളിപ്പെടുത്തുന്നു. കമ്പൈൻഡ് ആയിട്ടുള്ള ഇൻസ്ട്രുമെന്റ് പാനലാണ് ഇദ്ദേഹത്തിനുള്ളത്. ഷാർപ്പായി നിൽക്കുന്ന പിൻഭാഗത്തെ ഇത്തിരി കുഞ്ഞൻ റ്റൈൽ ലാമ്പ് വളരെ ആകർഷണീയമാണ്. ഇതിന്റെ ഹാഫ് ചെയിൻ കേയ്സ് ട്വിസ്റ്ററിനു ഒരു പുതിയ ഭാവം നൽകുന്നു. 110 സി.സി എഞ്ചിൻ എന്നത് സ്മൂത്ത് ആയിട്ടുള്ള ഡ്രൈവിനു മുന്നോടിയാകുന്നു. വീലുകളുടെ രൂപഭംഗി കൂട്ടുന്നതിനു വേണ്ടി വി – ഷേപ്പ് അല്ലോയിയാണു ഉപയോഗിച്ചിരിക്കുന്നത്. ഇതിന്റെ മാസ്സ് ഫോർവേർഡ് പ്രൊപ്പോർഷൻ മെച്ചപ്പെട്ട സ്റ്റബിലിറ്റിയും എജിലിറ്റിയും നൽകുന്ന മാസ്സ് സെണ്ട്രലൈസേഷൻ കൺസെപ്റ്റിലുള്ളതാണ്. ഇലക്ടിക് യെല്ലൊ മെറ്റാലിക്, പേൾ നൈറ്റ് സ്റ്റാർ ബ്ലാക്, പേൾ സീയെന്നാ റെഡ്, കാൻഡി പാം ഗ്രീൻ, ഹെവി ഗ്രേ മെറ്റാലിക്, പേൾ സൺ ബീം വൈറ്റ് എന്നിങ്ങനെ വ്യത്യസ്ത നിറങ്ങളിൽ സി.ബി. ട്വിസ്ടർ ലഭ്യമാണ്. 

മൈലേജും വിലയും

ഇനി അവസാനത്തെ ചടങ്ങിലേക്ക്. ലിറ്ററിനു 70 കിലോമീറ്റർ ആണ് കമ്പനി വാഗ്ദാനം ചെയ്യുന്ന മൈലേജ്. എന്നാൽ 82 വരെ മൈലേജ് ലഭിച്ചവരും ഉണ്ട്. പെട്രോൾ വില വച്ചു നോക്കുമ്പോൾ ഇത്രയും സവിശേഷതകളോടു കൂടിയ ഇദ്ദേഹത്തിനു ഇത്രയും മൈലേജ് എന്നു പറഞ്ഞാൽ ഈശ്വരന്റെ പുതിയ അവതാരങ്ങളിൽ ഒന്നാണ് ട്വിസ്റ്റർ എന്നു തോന്നിപ്പോകും അല്ലേ? ഇനി വിലകൂടി കേട്ടാൽ നിങ്ങളും സമ്മതിക്കാതിരിക്കില്ല, ട്വിസ്റ്ററിന്റെ എക്സ് ഷോറൂം വില സ്റ്റാൻഡേർഡ് മോഡലിന് 49321ഉം സെൽഫ് വിത് ഡിസ്ക് മോഡലുകൾക്ക് 52380ഉം ആണ്. ആശ്ചര്യം തോന്നുന്നു അല്ലേ? സംശയിക്കേണ്ടാ ഇതു സത്യമാണ്. ഇപ്പോൾ മനസ്സിലായില്ലേ ചെറുപ്പക്കാർക്ക് ഈ ചെറുപ്പക്കാരനെ ഇഷ്ടപ്പെടാനുള്ള കാരണം! ഇനിയും വിശ്വസിക്കാത്തവരോട് എനിക്ക് ഒന്നേ പറയാനുള്ളൂ, കണ്ടറിയാത്തവൻ കൊണ്ടറിയും.

ഒരു രാജാവിന്റെ കീർത്തിപ്രഭാവം

ശരത് കെ.ശശി

 

നിങ്ങൾ ബസിനു പുറകേ ഓടിക്കൊണ്ടിരിക്കുന്നു. ആ സമയത്ത് പിന്നിൽ നിന്നൊരു ഹോണടി. സ്ലോമോഷനിൽ തിരിഞ്ഞു നോക്കുമ്പോൾ സി.ബി.ആർ.. ഇപ്പോൾ നിങ്ങൾ എന്തിനു പുറകേ ഓടും? ബസിനോ സി.ബി.ആറിനോ? സംശയിക്കേണ്ടാ, സി.ബി.ആറിനു പുറകേ തന്നെ. അല്ലെങ്കിലും എല്ലാവരുടെ മനസ്സിലും ഒരാഗ്രഹമുണ്ടാവുകയില്ലേ, ലോകം കൊതിക്കുന്ന സൂപ്പർ ബൈക്കായ സി.ബി.ആറിനെ ഒന്നു തൊടാൻ, കൂടെ നിന്നൊരു ഫോട്ടോ എടുക്കാൻ! എങ്കിൽ ഇനി വൈകിക്കേണ്ടാ. സി.ബി.ആറിനെ പരിചയപ്പെട്ടോളൂ. 

എൻജിൻ

സി.ബി.ആർ 250 ആർ! പേരു കേൾക്കുമ്പോൾ തന്നെ പേടി ആകുന്നുവല്ലേ? പേരു പോലെ തന്നെയാണു പുള്ളിയും.  8500 ആർ.പി.എം ൽ  25 ബി.എച്ച്. പി ആണ് ആശാന്റെ കരുത്ത്.  ടോർക് 7000 ആർ.പി.എം. ൽ 22.9 എൻ.എം. എന്നു പറഞ്ഞാൽ വണ്ടി ഓണാക്കി ഓഫാക്കുന്നതു വരെ നിലം തൊടില്ല എന്നർത്ഥം. ഡിസ്പ്ലേസ്മെന്റ് 249.6 സി.സി.യുള്ള ലിക്വിഡ് കൂൾഡ് ഫോർ സ്ട്രോക്ക് എൻജിനാണ് ഹോണ്ടാ സി.ബി.ആറിനു നൽകിയിരിക്കുന്നത്. ബോർ * സ്ട്രോക് 76 എം.എം. * 55 എം.എം ആണ്. ഇതിന്റെ കമ്പ്രഷൻ റേഷ്യോ 10.7 : 1 ആണ്. ഡി.ഓ.എച്ച്. സി ഫോർ വാൽവ് സിസ്റ്റം ആണ് ആശാൻ സ്വീകരിച്ചിരിക്കുന്നത്. എൻജിന്റെ സുഖമായ പ്രവർത്തനത്തിനുവേണ്ടി വെറ്റ് ലൂബ്രിക്കേഷനാണ് സി.ബി.ആറിനുള്ളത്. വിസ്കസ് എയർ ഫിൽറ്റർ സി.ബി.ആറിന്റെ മറ്റൊരു പ്രത്യേകതയാണ്. ഇലക്ട്രിക് സ്റ്റാർട് സിസ്റ്റം ആണ് ഹോണ്ട ഇതിൽ ഉപയോഗിച്ചിരിക്കുന്നത്. 

ഡ്രൈവ് ട്രെയിൻ

സിക്സ് സ്പീഡ് ഗിയറുകളുള്ള സി.ബി.ആറിനു വൺ അപ് ഫൈവ് ഡൌൺ എന്നിങ്ങനെയാണ് ട്രാൻസ്മിഷൻ. ഫൈനൽ ട്രാൻസ്മിഷൻ സീൽഡ് ചെയിൻ ആണ്. ഇതിന്റെ ക്ലച്ച് ടൈപ്പ് വെറ്റ്, മൾട്ടിഡിസ്ക് എന്നിങ്ങനെയാണ്. മൊത്തത്തിൽ പറഞ്ഞാൽ സച്ചിനും സി.ബി.ആറും ഒരേ തോണിയിലെ രണ്ടു യാത്രക്കാരാണെന്നു കരുതാം. സച്ചിൻ ഗ്രൌണ്ടിൽ പന്തു പറപ്പിക്കുമ്പോൾ സി.ബി.ആർ റോട്ടിൽ ഡ്രൈവറെ പറപ്പിക്കുന്നു എന്നൊരു വ്യത്യാസം മാത്രം.

ഡൈമൻഷൻസ്

ഇത്രയുമൊക്കെ കാട്ടിക്കൂട്ടണമെങ്കിൽ ആളു നിസ്സാരക്കാരനായിരിക്കരുതല്ലോ! പുള്ളിയുടെ കെർബ് വെയിറ്റ് 167 കിലോഗ്രാമും നീളം 2032 മില്ലീമീറ്ററും വീതി 720 മില്ലീമീറ്ററും ഉയരം 1127 മില്ലീമീറ്ററും ആണ്. വീൽ ബേയ്സ് 1367 മില്ലീമീറ്റർ ഉള്ള സി.ബി.ആറിന് ട്യൂബ് ലെസ്സ് ടയറുകൾ ആണുള്ളത്. ഫ്രണ്ട് 110 / 70 17ഉം റിയർ 140/70 17ഉം ആണ്. 145 മില്ലീമീറ്റർ ഗ്രൌണ്ട് ക്ലിയറൻസ് എന്നത് സി.ബി.ആറിന്റെ മാറ്റു കൂട്ടുന്നു. 13 ലിറ്റർ കപ്പാസിറ്റിയുള്ള പെട്രോൾ ടാങ്കിൽ റിസർവിനു പകരം പി.ജി.എം – എഫ്. ഐ. (ഫ്യൂവൽ ഇഞ്ചക്ഷൻ) ടെക്നോളജിയാണ് ഹോണ്ട ഉപയോഗിച്ചിരിക്കുന്നത്. ഇതു മൂലം മൂന്നര ലിറ്ററിൽ വണ്ടി എപ്പോൾ എത്തുന്നോ അപ്പോൾ മുതൽ മീറ്റർ കൺസോളിൽ സൂചനകൾ ലഭിക്കുന്നതാണ്. ഈ ടെക്നോളജി മൂലം നല്ല തണുപ്പുള്ള കാലാവസ്ഥയിലും എളുപ്പത്തിൽ വണ്ടി സ്റ്റാർട്ട് ചെയ്യാനാകുന്നു. പുകയുടെ അളവു കുറച്ച് പെർഫോർമൻസും മൈലേജും വർദ്ധിപ്പിക്കുന്നു. ആശാൻ ഒരു സകലകലാ വല്ലഭൻ അല്ലേ?

ചേസിസ്

വളരെ ആകർഷണീയമായ ട്വിൻ സ്പാർ ടൈപ്പ് ഫ്രൈം ആണ് സി.ബി.ആറിന് ഉള്ളത്. ഫ്രണ്ട് ടെലസ്കോപിക്ക് ഫോർക്കും റിയർ പ്രോലിങ്കും ആണു സസ്പെൻഷൻ. ഫ്രണ്ട് 296 മില്ലീമീറ്ററും റിയർ 220 മില്ലീമീറ്ററും ഉള്ള രണ്ടു ഡിസ്ക് ബ്രേക്കുകളാണ് സി.ബി.ആറിന് ഉള്ളത്. നിൽക്കട്ടെ! ഒരു കാര്യം പറയാൻ വിട്ടു. ഇന്നു വിമാനങ്ങളിലും മറ്റും ഉപയോഗിച്ചുവരുന്ന ഏ.ബി.എസ്. (ആന്റി ലോക്ക് ബ്രേക്കിങ്ങ് സിസ്റ്റം) സി.ബി.ആറിന്റെ മറ്റൊരു പ്രത്യേകതയാണ്. (ഏ.ബി.എസ്. ഉള്ളതും ഇല്ലാത്തതുമായ മോഡലുകൾ ലഭ്യമാണ്) 

ഇലക്ട്രിക്കലും മറ്റുള്ളവയും

ഡിജിറ്റൽ ഇ.സി.യു. ബേയ്സഡ് ഇഗ്നീഷൻ ആണ് സി.ബി.ആറിന് ഉള്ളത്. ബാറ്ററി 12 വോൾട്ട് –  6 ഏ.എച്ച്. എം.എഫ്. (മെയിന്റനൻസ് ഫ്രീ) ആണ്. പ്രത്യേകമായി ഡിസൈൻ ചെയ്ത  12 വോൾട്ട് 60 / 55 വാട്ട് എച്ച് 4 ഹെഡ് ലാമ്പ് സി.ബി.ആറിന് ഒരു സ്പോർട്ടീ ലുക്ക് നൽകുന്നു. ഇത്രയും പറഞ്ഞിട്ടും മൈലേജിക്കുറിച്ച് പറയാത്തതെന്തുകൊണ്ടാണെന്നായിരിക്കും ഇപ്പോളത്തെ ചിന്ത അല്ലേ? എന്നാൽ കേട്ടോളൂ. ഓൺറോഡിൽ ലിറ്ററിനു 40 കിലോമീറ്ററും ഓഫ് റോഡിൽ 38 കിലോമീറ്ററും ആണ് കമ്പനി വാഗ്ദാനം ചെയ്യുന്ന മൈലേജ്. ഇനി സീറ്റിങ്ങ് കംഫർട്ടബിലിറ്റിയെ കുറിച്ച്. രണ്ട് പ്രതലങ്ങളിലായാണു സി.ബി.ആറിന്റെ സീറ്റുകൾ ക്രമീകരിച്ചിരിക്കുന്നത്. ഇതു സ്പോർട്ടി ലുക്ക് വർദ്ധിപ്പിക്കാൻ സി.ബി.ആറിനെ സഹായിക്കുന്നു. ഇതിന്റെ കംഫർട്ടബിൾ റൈഡിങ്ങ് പൊസിഷൻ മൂലം ഈസി ഹാൻഡ്ലിംഗ്  സാദ്ധ്യമാകുന്നു. സി.ബി.ആറിന്റെ എയറോഡൈനാമിസം വെളിപ്പെടുത്തുന്ന സ്പോർട്ടി കൌൾ ഇതിന്റെ കരുത്തിനെ സൂചിപ്പിക്കുന്നു. ഇതിന്റെ ഇരു വശത്തും ഘടിപ്പിച്ചിരിക്കുന്ന ടേൺ ഇൻഡിക്കേറ്ററുകൾ വളരെ നന്നായി തന്നെ ഡിസൈൻ ചെയ്തിരിക്കുന്നു. കാൻഡി റൂബി റെഡ് എക്സ് ആക്യുരേറ്റ് സിൽവർ മെറ്റാലിക്, ആസ്റ്റിറൊയ്ഡ് ബ്ലാക് മെറ്റാലിക്  എക്സ് ആക്യുരേറ്റ് സിൽവർ മെറ്റാലിക്,  സ്വോർഡ് സിൽവർ മെറ്റാലിക് എക്സ് ആക്യുരേറ്റ് സിൽവർ മെറ്റാലിക് എന്നിങ്ങനെ മൂന്നു വ്യത്യസ്ത നിറങ്ങളിൽ സി.ബി.ആർ ലഭ്യമാണ്. ഹണികോമ്പ് പോലെയുള്ള സി.ബി.ആറിന്റെ ടെയിൽ ലൈറ്റ് ലെൻസ് ഡിസൈൻ സൌന്ദര്യവും ലൈറ്റ് ഡിസ്ട്രിബ്യൂഷനും പെർഫോർമൻസും വർദ്ധിപ്പിക്കുന്നു. ടഫും ഫ്ലക്സിബിളുമായ ഡയമണ്ട് ഫ്രെയിം വിത്ത് ട്രസ്സ് സ്ട്രക്ചർ എല്ലാതരം യാത്രാസാഹചര്യങ്ങളിലും സ്റ്റബിലിറ്റിയും ഈടും നൽകുന്നു. എന്റമ്മോ! തൃശ്ശൂർ പൂരം കഴിഞ്ഞതുപോലെയുണ്ടല്ലേ? നിൽക്ക്. അവസാനത്തെ അമിട്ടിനു തീ കൊടുക്കട്ടെ. ആശാന്റെ എക്സ്ഷോറൂം വില എത്രയെന്നോ? 145721 രൂപ. ഇതു സ്റ്റാൻഡേർഡ് മോഡലിന്. 170749 രൂപ വരും ഏ.ബി.എസ്. മോഡലിന്. ആക്സസറീസിനു കാശു വേറെ വേണം. ഇപ്പോൾ എങ്ങനെയുണ്ട്? ഞാൻ പറഞ്ഞപോലെ നാളെ മുതൽ സി.ബി.ആറിന് പുറകേ ഓടുകയല്ലേ?

കടപ്പാട് : ദാസ്, സെയിൽസ്  എക്സിക്യുട്ടീവ്, ആര്യഭംഗി മോട്ടോഴ്സ്, അങ്കമാലി

ഫോട്ടോ : സുജിത് ശേഖരൻ