ക്ഷമസ്വ മേ പൃഥ്വീ

അമീബ

 

ഒരു ബഹിരാകാശവീക്ഷണത്തിൽ കരയിൽ എന്താണു കാണുക? സർവമംഗലയാം ഭൂമി തന്റെ പച്ചപ്പട്ടാംബരത്തിൽ പൊതിയപ്പെട്ടു നിൽക്കുന്ന മനോഹാരിതയല്ലാതെ! ഇനി ഒന്നു സൂം ചെയ്താലോ? ഈ മനോഹാരിതയ്ക്കു കാര്യമായ ഉടവു തട്ടുന്നതു കാണാം. അതങ്ങനെയാണ്, സത്യം അത്യന്തം അവിശ്വസനീയവുമാണ്. 

സരതുസ്ത്ര മരുഭൂമികളേയും വിളവില്ലാത്ത സ്ഥലങ്ങളേയും തിന്മയുടെ മൂർത്തീഭാവങ്ങളായാണ് കാണുന്നത്. അവയങ്ങനെ പെരുകി വരുന്നതാണ് ആദ്യ ദൃശ്യം. പിന്നെ കോൺക്രീറ്റ് കാടുകളായി. കരയുടെ അഞ്ചു ശതമാനമെങ്കിലും വരുന്ന റോഡുകളും പാലങ്ങളും അടുത്തതായി. ഉപേക്ഷിക്കപ്പെട്ട് മലിനത തള്ളാൻ വിധിക്കപ്പെട്ട പഴയ കൃഷിയിടങ്ങളും തകർക്കപ്പെട്ട കണ്ടൽ കാടുകളും. ആമസോണൈന്റെ ചില ഭാഗങ്ങളടക്കം വറ്റിവരണ്ട നദികളും ജലാശയങ്ങളും. അവിടെയിവിടെയായി ചില വനങ്ങൾ. ഒന്നു കൂടി സൂക്ഷിച്ചു നോക്കിയാൽ അവയിൽ മിക്കതും പ്ലാന്റേഷനുകൾ ആണെന്നു കാണാം. കാടു പ്ലാന്റു ചെയ്യുന്നതാണ് പുതിയ ഫാഷൻ. ഒടുവിലായി കൃഷി ചെയ്യുന്ന വയലുകളും താമസ സ്ഥലങ്ങളോടു ചേർന്ന പച്ചപ്പുകളും. 

അനേകം പുകതുപ്പുന്ന കുഴലുകൾ കാണുന്നത് ഫാക്ടറികളാണ്. അവയ്ക്കു ചുറ്റും മലിനമായ വസ്തുക്കൾ ചിതറിക്കിടക്കുന്നു. ചുറ്റുപാടുമുള്ള മരങ്ങളുടെ നിറം പോലും മാറിയിരിക്കുന്നു. വെള്ളത്തിനും മഞ്ഞകലർന്ന ചുവപ്പുനിറം കാണാം.

മണ്ണിൽ മാരകമായ കീടനാശിനികൾ. അളവില്ലാതെ രാസവളങ്ങൾ. പ്ലാസ്റ്റിക്കും പാറക്കഷണങ്ങളും തുണിയും ഗ്ലാസ്സും ലോഹഭാഗങ്ങളും എങ്ങും ചിതറിക്കിടക്കുന്നു. പലയിടത്തും ജീനിൽ വ്യതിയാനം വരുത്തിയ കൃത്രിമ വിളകൾ. ആർസനിക്കും മെർക്കുറിയും ഡി.ഡി.റ്റി.യും മണക്കുന്ന മണ്ണിനു പശിമയോ ജീവനോ ഇല്ല. 

മറ്റു ജീവജാലങ്ങൾക്കില്ലാത്ത ഒരു കഴിവു മനുഷ്യർക്കുണ്ടെന്നു ഞങ്ങൾ അവകാശപ്പെടുന്നു. അമ്മയേയും പെങ്ങളേയും തിരിച്ചറിയാനുള്ള കഴിവാണത്. ഉപഭോഗത്തിന്റെയും വികസനത്തിന്റേയും കാര്യത്തിൽ ഞങ്ങൾക്ക് ആ കഴിവു നഷ്ടപ്പെട്ടിട്ടുണ്ടെങ്കിൽ, മറ്റൊന്നും പറയാനില്ല.

ക്ഷമസ്വ മേ പൃഥ്വീ.

അശുദ്ധമായ ജലസ്രോതസ്സുകൾ

അമീബ

കടലോളം ജലം ഭൂമിയിൽ മറ്റെങ്ങുമില്ല. കടൽ ജലത്തോളം മലീമസമായ ജലവും അപ്രകാരം തന്നെ. ഭൂഗുരുത്വബലത്തെ ആശ്രയിച്ച് ചലിക്കുന്ന ജലം അന്തിമമായി കടലിലെത്തിച്ചേരുന്നു. നദികളാണ് കടലിലേക്ക് ജലമെത്തിക്കുന്ന പ്രധാന സ്രോതസ്സുകൾ. അവ ജൈവവും അജൈവവുമായ സകല വസ്തുക്കളും കടലിലെത്തിക്കുന്നു. ലവണങ്ങൾ, മണൽ, ചളി, ജൈവാവശിഷ്ടങ്ങൾ, ചണ്ടികളും കുളവാഴകളുമടങ്ങുന്ന സസ്യജാലം എന്നിവയെല്ലാം ഇതിൽ പെടുന്നു. ഇവയെല്ലാം ഒരു വിധത്തിലല്ലെങ്കിൽ മറ്റൊരു വിധത്തിൽ കടലിന്റെ ജൈവ സന്തുലനാവസ്തയെ അനുകൂലമായി ബാധിക്കുന്നവയാണ്. 

കടലിലെ ജലം നീരാവിയായി പോകുമ്പോൾ കടൽ വെള്ളത്തിലെ ലവണാംശം വർദ്ധിച്ച് ഒടുവിൽ ചാവുകടലിലേതുപോലെ മത്സ്യങ്ങൾക്കു പോലും ജീവിക്കാൻ കഴിയാത്തതായി തീരുന്നു. പുഴകളിൽ നിന്നുള്ള തുടർച്ചയായ നീരൊഴുക്കില്ലെങ്കിൽ ഈ പ്രക്രിയ അതീവ വേഗത്തിലാകുന്നു. കടൽ വെള്ളം ഉപ്പിന്റെ അതിപൂരിത ലായനിയായിത്തീരുന്നു. ലോകത്തിലെ സകല കടലുകളും അന്തിമമായി ഇപ്രകാരമൊരു അവസ്ഥയിലേക്ക് ഏതാനും കോടി വർഷങ്ങൾക്കു ശേഷം എത്തിച്ചേരുമെന്നു പ്രതീക്ഷിക്കേണ്ടിയിരിക്കുന്നു. അക്കാലത്ത് കരയിലെ ലവണാംശം നഷ്ടപ്പെടുന്നതുകൊണ്ട് അഴിമുഖങ്ങളോട് ചേർന്ന ഭാഗങ്ങളിലൊഴികെ സസ്യജാലമടക്കമുള്ള സകല ജീവജാലങ്ങൾക്കും ഇന്നത്തെ നിലയിൽ നിലനിൽക്കാനാകാത്തതിനാൽ കനത്ത ജീവ പരിണാമത്തിനു അവ വിധേയമായിട്ടുണ്ടാകും. കോടി വർഷങ്ങൾക്ക് ശേഷമുള്ള കാര്യമെല്ലാം പിന്നെ പറയാം എന്നാണെങ്കിൽ ഈ കോടികളെ ഏതാനും നൂറ്റാണ്ടുകളായി ചുരുക്കാൻ മനുഷ്യവർഗം കെല്പുള്ളതായിട്ടുണ്ട് എന്ന സന്തോഷ വർത്തമാനം അറിയിക്കട്ടെ.

നദികളിലൂടെ ഇപ്പോൾ കടലിലെത്തുന്നതിൽ ലവണങ്ങൾ മാത്രമല്ല. ലോകത്ത് ഇന്നു ഓരോ വർഷവും ലക്ഷക്കണക്കിനു ടൺ കിടനാശിനികൾ അടങ്ങുന്ന വിഷം ഉത്പാദിപ്പിക്കുന്നത് അന്തിമമായി കടലിൽ തന്നെ ചെന്നു ചേരുന്നുണ്ട്. കീടനാശിനികളുടെ ആയിരത്തോളം ഇരട്ടി വരുന്ന രാസവളങ്ങളിൽ നല്ലൊരു പങ്കും മഴവെള്ളത്തിൽ ലയിച്ച് ഇപ്രകാരം കടലിലെത്തുന്നു. ജൈവാവരണം നഷ്ടപ്പെട്ടുകൊണ്ടതുകൊണ്ട് വർദ്ധിച്ച മണ്ണൊലിപ്പ് മറ്റ് അവശിഷ്ടങ്ങളുടെ കാര്യത്തിലും ധാരാളിത്തത്തിനു കാരണമാകുന്നു. 

പ്ലാസ്റ്റിക്, ഫാക്ടറികളിലെ മാലിന്യങ്ങൾ, നഗരവത്കരണത്തിന്റെ ഭാഗമായി സൃഷ്ടിക്കപ്പെടുന്ന മാലിന്യക്കൂമ്പാരങ്ങൾ, മനുഷ്യന്റേയും ഫാമുകളിൽ കൂട്ടമായി വളർത്തുന്ന ജന്തുക്കളുടേയും ഉച്ചിഷ്ടങ്ങളും വിസർജ്യങ്ങളും, മറ്റും കരയിലെ ശുദ്ധജലാശയങ്ങളെയും നദീ പ്രവാഹങ്ങളേയും മലിനമാക്കിയശേഷം  അന്തിമമായി കടലിനേയും വിഷലിപ്തമാക്കുന്നു. 

ഇതൊന്നും പോരാഞ്ഞിട്ടാണ് ചാക്കുകളിൽ കെട്ടിയ പ്ലാസ്റ്റിക് മാലിന്യങ്ങൾ നേരിട്ട് കടലിൽ തട്ടുന്നത്. കടൽ തീരത്തുള്ള പല ഫാക്ടറികളും അവയുടെ അവശിഷ്ടങ്ങളും മലിനജലവും കടലിലേക്കു തട്ടുന്നു. ആണവ അവശിഷ്ടങ്ങൾ അന്തിമമായി ഗ്ലാസ്സിൽ ഉരുക്കിച്ചേർത്തോ അല്ലാതെയോ കോൺക്രീറ്റു ബ്ലോക്കുകളിലാക്കി കടലിൽ നിക്ഷേപിക്കുന്നു. ന്യൂക്ലിയർ ഇന്ധനമുപയോഗിക്കുന്ന അന്തർവാഹിനികളും മറ്റും ഉണ്ടാക്കുന്ന വികിരണങ്ങൾക്കു പുറമേ ആണവനിലയങ്ങൾ തണുപ്പിക്കാൻ കടൽ ജലം നേരിട്ട് ഉപയോഗിക്കുന്ന ഇടങ്ങളിൽ അത്യധികമായ താപത്തിനു പുറമേ ഘനജലം പോലും ചിലപ്പോളെല്ലാം പുറത്തു വിടുന്നുണ്ട്. ജപ്പാനിൽ ഈയിടെയുണ്ടായ ആണവനിലയ സ്ഫോടനത്തിൽ ചെറുതല്ലാത്ത ആണവ പദാർത്ഥങ്ങൾ കടലിലെത്തിയിട്ടുണ്ട്. ചെർണോബിൽ ദുരന്തത്തിൽ അന്തരീക്ഷത്തിലേക്കു വ്യാപിച്ച ആണവപദാർത്ഥങ്ങളിൽ നല്ല പങ്കും മഴയോടൊപ്പം കടലിലെത്തിയിട്ടുണ്ട്.

ഭാഗ്യത്തിനു സൂര്യൻ ചൂടാക്കിയെടുക്കുന്ന നീരാവി വീണ്ടും കരയിൽ വെള്ളമായെത്തുമ്പോൾ അല്പം ശുദ്ധി കാട്ടുന്നുണ്ട്. എന്നിട്ടും നമ്മുടെ പുഴകളിലേയും കിണറുകളിലേയും വെള്ളം തിളപ്പിക്കാതെ കുടിക്കാനെടുക്കരുത് എന്നു ആരോഗ്യ പ്രവർത്തകർ പറയുന്നതിനു ഒരർത്ഥമേയുള്ളൂ. കടലിനേക്കാളും മോശമായി കരയും നാം മലിനമാക്കിക്കളഞ്ഞു.

മാലിന്യം പ്രധാന ഉല്പന്നമല്ലാത്ത യാതൊരു വികസനവും നമുക്കറിയുകയില്ലെന്നുണ്ടോ? ഒരു പക്ഷേ മാലിന്യമായിരിക്കില്ല, മാലിന്യത്തെ തിരിച്ചറിയാത്ത നമ്മുടെ തലച്ചോറുകളായിരിക്കണം വേസ്റ്റ്.

സർവത്ര അഗ്നി പടരുന്നു

അമീബ

പഞ്ചഭൂതങ്ങളിൽ അഗ്നി ദർശനകാരണമാകുന്നു. ജ്യോതിസ്സെന്നു വിളിക്കപ്പെടുന്ന ഇവ വ്യാപനശേഷി ഉള്ളവയത്രേ. ആധുനികർ പറയുന്ന ഇലക്ട്രോമാഗ്നെറ്റിക് സ്പെക്ട്രമാണീ ജ്യോതിസ്. അഗ്നി മനുഷ്യർ ഭൂമിയിൽ നിയന്ത്രണവിധേയമാക്കിയത് മാനവ സംസ്കൃതിക്കൊരു കുതിച്ചുചാട്ടം നൽകി. പിന്നെ മനുഷ്യവർഗം തീ ഉപയോഗിച്ചതിനൊരു കണക്കില്ല. പുരാതനകാലങ്ങളിൽ അഗ്നി സൃഷ്ടിക്കാൻ ജൈവവസ്തുക്കൾ വൻ തോതിൽ ഭസ്മമാക്കി. ഒടുവിൽ അവയുടെ ലഭ്യത ക്രമത്തിൽ കുറഞ്ഞുവന്നു. ഭൌമാന്തർഭാഗത്ത് അകപ്പെട്ടുപോയ ജൈവവസ്തുക്കൾ കുഴിച്ചെടുത്ത് ഉപയോഗിക്കലാണിപ്പോൾ. പെട്രോളിയവും ഗ്യാസും കൽക്കരിയും എടുത്തു തീരാറായെന്നു രാഷ്ട്രങ്ങൾ പരാതി പറഞ്ഞു തുടങ്ങിയിരിക്കുന്നു. യൂറേനിയവും പ്ലൂട്ടോണിയവുമാണിനി പ്രധാനമത്രേ. അവയാണെങ്കിൽ ഏതാനും ചില രാജ്യങ്ങളിലേ ലാഭകരമായി ഖനനം ചെയ്യാൻ തക്ക അളവിലുള്ളൂ താനും. സൌരോർജ്ജവും ഗതികോർജ്ജവും സ്ഥാനികോർജ്ജവുമൊക്കെ ഉപയോഗിച്ചാലും തീരില്ല പോലും. പക്ഷേ അവ വേണ്ടത്ര ലഭ്യമാകുന്ന സ്ഥലകാലങ്ങളിൽ മാത്രമേ പ്രയോജനപ്പെടുത്താനാകൂ. കുറേയൊക്കെ വൈദ്യുതിയാക്കി വിതരണം ചെയ്യാനുമാകും. 

എൻട്രോപ്പി എന്നൊരു പ്രതിഭാസമുണ്ട്. പ്രകൃതിയിലെ രണ്ട് ഊർജ്ജ നിലകളിലുള്ള രണ്ടു പദാർത്ഥങ്ങൾ സ്പർശിക്കുമ്പോൾ അവയുടെ ഊർജ്ജം സമീകരിക്കപ്പെടുവാനുള്ള ഒരു പ്രവണതയാണത്. ഈ എൻട്രോപ്പി പ്രവർത്തിക്കുന്നതിനാലാണ് കപ്പലുകൾക്ക് കടലിലെ വെള്ളം ഐസാക്കിമാറ്റി ആ ഊർജ്ജം കൊണ്ട് പ്രവർത്തിക്കാനാകാത്തത്. എൻട്രോപ്പിക്കുള്ള ഏക അപവാദം ജീവനാർന്ന പദാർത്ഥങ്ങളാണ്. അതിനാലത്രേ ഏറെയൊന്നും നഷ്ടപ്പെടാതെ ജീവജാലങ്ങൾക്ക് സൌരോർജ്ജവും മറ്റും സംഭരിച്ചു വയ്ക്കാനാകുന്നത്. അപ്രകാരം സഹസ്രാബ്ദങ്ങൾകൊണ്ട് സംഭരിച്ചുവച്ചതാണ് പതിറ്റാണ്ടുകൾ കൊണ്ട് അഗ്നിയാക്കിമാറ്റുന്നത്.

ജീവജാലങ്ങളുടെ വൈവിധ്യവും എണ്ണവും കാര്യമായി കുറഞ്ഞത് സൌരോർജ്ജം വേണ്ടത്ര ആഗിരണം ചെയ്യപ്പെടാതെ അന്തരീക്ഷ താപനില വർദ്ധിപ്പിക്കാൻ ഇടയാക്കി. ഓസോൺ പാളിയിൽ വിള്ളലുണ്ടായതിനു കാരണം വ്യാവസായിക അവശിഷ്ടവാതകങ്ങൾ സ്വതന്ത്രമായതു മാത്രമല്ല, വനനശീകരണത്തെയും മറ്റും തുടർന്നുള്ള അന്തരീക്ഷോഷ്മാവിലെ വർദ്ധനകൂടിയാണ്. കാർബൺ ഡൈ ഓക്സൈഡിന്റെ ആധിക്യവും ആനുപാതികമായ ഓക്സിജന്റെ കുറവും ഓസോൺ നിർമ്മാണത്തിന്റെ നിരക്കു കുറച്ചു.   

ഇങ്ങനെ ഭൂമുഖത്താകമാനം അഗ്നികൊണ്ടു നിറച്ചു നാമൊരുക്കുന്ന വ്യവസായവത്കൃതലോകത്തിന്റെ പരിണിതഫലങ്ങൾ മറ്റു ജീവജാതികളാണു ആദ്യം അനുഭവിക്കുന്നതെങ്കിലും എന്നെങ്കിലും മനുഷ്യ വർഗം ഇതിനു കണക്കു പറഞ്ഞേ മതിയാകൂ. എയർ കണ്ടീഷണർ എൻട്രോപ്പിക്കു വിധേയമായതുകൊണ്ട് അന്തിമമായി ഭൂമിയുടെ ഊഷ്മാവ് പിന്നെയും വർദ്ധിപ്പിക്കുകയേ ഉള്ളൂ.

ആണവപദാർത്ഥങ്ങൾ അനേകവർഷങ്ങളിലെ നിയന്ത്രിത വിഘടനം വഴി ഭൂമിയിലേക്കു തുറന്നു വിടുന്ന താപത്തിന്റെ ഒരു മടങ്ങ് അത്ര തന്നെ വർഷങ്ങളിലൂടെ ഭൂമിയിൽ നിന്നും ബഹിരാകാശത്തേക്ക് രക്ഷപ്പെടുന്ന വികിരണങ്ങളായി നഷ്ടപ്പെടുന്നുണ്ട്. എന്നാൽ ഒരു പിശകിൽ നിന്നു തുടങ്ങാവും ഒരു ശൃംഘലാപ്രവർത്തനം സൃഷ്ടിക്കാവുന്ന ആണവവിസ്ഫോടനം അന്തരീക്ഷത്തിലേക്കു വിക്ഷേപിക്കുന്ന താപം ചില്ലറയല്ല. കടലിന്റെ ഊഷ്മാവു അര ഡിഗ്രി ഉയർന്നാൽ തന്നെ സമുദ്രഹിമാനികളിൽ അതുണ്ടാക്കാവുന്ന ആഘാതം ആഗോള തലത്തിലായിരിക്കും.

അഗ്നിയുടെ അനിയന്ത്രിതമായ ഈ ഉപഭോഗപരതയ്ക്കു രാഷ്ട്രീയ പരിഹാരമാണു വേണ്ടത്. എന്നാൽ നമ്മുടെ രാഷ്ട്രീയക്കാർ അഗ്ന്യാരാധകരായി മാറിയിരിക്കുന്നു. ഊർജ്ജം ഊർജ്ജം കൂടുതൽ ഊർജ്ജം എന്നതാണവരുടെ പൊതു മുദ്രാവാക്യം. വികസനവാദികളാണത്രേ അവർ. അമ്മയെ വിറ്റു മക്കൾ വികസിക്കുന്ന ആ പരിപാടിക്ക് മറ്റൊരു പേരു കണ്ടെത്തേണ്ടതുണ്ട്.

ഭൂമിയുടെ അവകാശികൾ

ആകാശം കീഴടക്കപ്പെടുന്നു

അമീബ

കോടിക്കണക്കിനു വർഷം ആരുടേതുമല്ലാതെയോ സകലരുടേതുമായോ സങ്കല്പിക്കപ്പെട്ട ആകാശത്തിനു മേലേ ആദ്യം കുത്തക സ്ഥാപിച്ചത് നവീനരാഷ്ട്രങ്ങൾ തന്നെയായിരുന്നു. യുദ്ധകലുഷിതമായ അന്തരീക്ഷം സൃഷ്ടിച്ച് രാജ്യസുരക്ഷയെന്ന പേരിൽ അന്യരാഷ്ട്രവിമാനങ്ങളെ നിരോധിക്കുകയായിരുന്നു ആദ്യപടി. പിന്നീട് തീവ്രവാദത്തിന്റെ പേരിൽ അകവും പുറവും നോക്കാതെ സകലത്തിലും നിയന്ത്രണം വന്നു. വ്യോമാകാശ നിയന്ത്രങ്ങൾ സാധിതമായ ശേഷം വൻ രാഷ്ട്രങ്ങൾ ബഹിരാകാശം ലക്ഷ്യം വച്ചു. ഇന്നു തകർന്നു തരിപ്പണമായ റഷ്യയുടെ നേതൃത്വത്തിലുള്ള ആ മുന്നേറ്റം ഒരു വെല്ലുവിളിപോലെ അമേരിക്കൻ ഐക്യനാടുകൾ തുടർന്നു വന്നു. ഒരു ഘട്ടത്തിൽ നക്ഷത്രയുദ്ധങ്ങൾ വരെ വിഭാവനം ചെയ്ത് വൻ ഫണ്ടുകൾ വകയിരുത്തി. 

അന്തരാഷ്ട്രീയ വിനിമയ മാധ്യമമെന്ന നിലയിൽ മറ്റു രാഷ്ട്രങ്ങൾ ഡോളർ വാങ്ങിക്കൂട്ടിയപ്പോൾ യഥാർത്ഥത്തിൽ ലോകത്തിലെ ഏറ്റവും കടബാധ്യതയുള്ള രാജ്യമായാണു തീർന്നതെങ്കിലും ഒഴുകി വന്നുകൊണ്ടിരുന്ന ഫണ്ട് സ്വന്തം വരുമാനമെന്നമട്ടിൽ ഇന്ത്യയടക്കമുള്ള മറ്റേതു രാജ്യത്തേയും പോലെ ഐക്യനാടുകളും കൈകാര്യം ചെയ്തു. അലാസ്കയിലെ സ്വർണ്ണഖനികളും ലോകമെമ്പാടുമുള്ള രാജ്യങ്ങളിൽ നിന്ന് അമേരിക്കൻ കമ്പനികൾ കുഴിച്ചെടുക്കുന്ന എണ്ണയും ആയുധവ്യവസായത്തിലെ കുത്തകയും രണ്ടാം ലോകമഹായുദ്ധകാലത്തെ തുടർന്ന് വിജയിയായ ഏറ്റവും വിസ്തൃതിയുള്ള ജനാധിപത്യരാജ്യമായ അമേരിക്കൻ ഐക്യനാടുകളിലേക്കു അന്യരാജ്യങ്ങളിൽ നിന്നുള്ള ധിഷണാശാലികളുടെ തുടർച്ചയായ കുടിയേറ്റവുമൊക്കെ ലോകത്തിലെ ഏറ്റവും ശക്തമായ രാജ്യമായി തുടരാനാകുമെന്നു അതിന്റെ ഭരണാധികാരികളെ വ്യാമോഹിപ്പിച്ചു. യുദ്ധത്തിനു തൊട്ടു മുമ്പു വരെ മാന്ദ്യം ബാധിച്ചു തകർന്നടിഞ്ഞു കിടന്നവരാണു തങ്ങളെന്നവവർ മറന്നുപോയി, പുതിയ മാന്ദ്യവും തകർച്ചയും മുന്നിലെത്തും വരേക്കു മാത്രമെങ്കിലും.

ധൂർത്തിന്റേയും സാമ്പത്തിക അച്ചടക്കരാഹിത്യത്തിന്റേയും കാലം കഴിഞ്ഞെന്നു സകലരും തിരിച്ചരിഞ്ഞു തുടങ്ങിയിട്ടു വർഷം പലതായിരിക്കുന്നു. അതുകൊണ്ട് നക്ഷത്ര യുദ്ധങ്ങളും ബഹിരാകാശ പരിപാടികളും ഐക്യനാടുകൾ നിറുത്തി വച്ചിട്ടു വ്യാപാരകാര്യങ്ങളിൽ ശ്രദ്ധ കേന്ദ്രീകരിക്കാൻ തുടങ്ങിയിട്ടു കാലം കുറച്ചായി. ചൈനയാണിപ്പോൽ ഹീറോ. കൃത്രിമോപഗ്രഹങ്ങളെ മിസ്സൈൽ തൊടുത്തുവിട്ടു തകർക്കാനുള്ള സാങ്കേതികത്തികവു വിജയകരമായി ആർജ്ജിക്കുകയാണവർ. മൊത്തത്തിൽ ആകാശയുദ്ധങ്ങൾ ലാഭകരമല്ലെന്നു ഇന്ത്യക്കും പാക്കിസ്ഥാനും കൊറിയകൾക്കുമൊഴികെ സകലർക്കും മനസ്സിലായെന്നു തോന്നുന്നു.

നക്ഷത്രയുദ്ധം അവസാനിപ്പിച്ചെങ്കിലും ആകാശത്തെ കൈവിടാൻ ആർക്കും മനസ്സു വരുന്നില്ല. അതുകൊണ്ട് ആകാശം വിറ്റു കാശാക്കാൻ മത്സരിക്കുകയാണോരോ രാജ്യവും. യാതൊരു നിയന്ത്രങ്ങളുമില്ലാതെ റേഡിയോകിരണങ്ങൾകൊണ്ട് ഭൂമണ്ഡലം നിറക്കാൻ മത്സരിക്കുന്നവർ ജൈവമണ്ഡലത്തിനതുണ്ടാക്കുന്ന ആഘാതത്തെ കുറിച്ച് കുറ്റകരമായ നിശബ്ദത പാലിക്കുന്നു. സ്പെക്ട്രം, സ്പെക്ട്രം സർവത്രസ്പെക്ട്രം, നമുക്കും കിട്ടണം പണം എന്നമട്ടിൽ സ്പെക്ട്രം നമ്മുടെ നാട്ടിൽ വിറ്റു കാശാക്കിയതിൽ കാര്യമായ നഷ്ടമൊന്നും പറ്റിയിട്ടില്ലെന്നു സി.ബി.ഐ. സാക്ഷ്യപ്പെടുത്തിയിട്ടുണ്ട്. എങ്കിലും ഇതെല്ലാം നടന്നത് രാജ്യതാത്പര്യം മാത്രം കണക്കിലെടുത്താണെന്നു ആരും പറയില്ല. ഒരു മലയാളി പത്രപ്രവർത്തകനു ആരോ സൽബുദ്ധി തോന്നി യഥാസമയം വാർത്ത ചോർത്തികൊടുത്തതുകൊണ്ട് ഇന്ത്യയിൽ ഇതിത്തിരി വിവാദമായിരിക്കുന്നു. മറ്റു നാടുകളിലെ സ്ഥിതി ആരറിയുന്നു? മൊത്തത്തിൽ മതിയായ പരിസ്ഥിതി ആഘാത പഠനങ്ങളും ആരോഗ്യത്തെ ഇതെങ്ങനെ ബാധിക്കും എന്നൊന്നും ആരെങ്കിലും പഠിച്ചതായി അറിയുന്നില്ല. നേരെമറിച്ച് അവിടെയും ഇവിടെയുമായി ആകാശത്തിലെ റേഡിയോ തരംഗങ്ങളുടെ അതിപ്രസരം ഗുരുതരമായ പ്രത്യാഘാതങ്ങളുണ്ടാക്കുന്നതായി പഠനങ്ങളുണ്ടായിട്ടുമുണ്ട്. പക്ഷേ ഔദ്യോഗിക പഠനങ്ങളെ മാത്രമേ മാധ്യമങ്ങൾ ആധികാരികമായെടുക്കാവൂ എന്നു മുകളിൽ നിന്നു കല്പനയുണ്ട്. പഠനം പക്ഷേ എൻഡോസൽഫാനിലേതുപോലെ, ഉല്പാദകർക്കു പറ്റിയ ഒരാളെ കണ്ടെത്തി ചെയർമാനാക്കി വിഷം തളി നിന്നിട്ട് പത്തു വർഷമെങ്കിലുമായി എന്നുറപ്പുവരുത്തി, രോഗബാധിതരിൽ മുക്കാലേ അരയ്ക്കാലും ചത്തൊടുങ്ങി മറ്റുള്ളവർ എന്തോ യാദൃശ്ചികതകൊണ്ട് അങ്ങനെയൊക്കെ ആയതാണെന്നും അതെങ്ങനെയായെന്നു സംശയാതീതമായി തെളിയിക്കാൻ കഴിയുന്നില്ലെന്നുമൊന്നും പറയാനാകില്ല. കാരണം മനസ്സറിഞ്ഞ് ഇവരാരെങ്കിലും മൊബൈലും സ്പെക്ട്രവുമൊക്കെ കെട്ടിപ്പൂട്ടി പോകുമെന്നു കരുതാൻ യാതൊരു ന്യായവുമില്ല, ഇനി അവർ സമ്മതിച്ചാലും അമീബ സമ്മതിക്കില്ല. അമീബക്കും മൊബൈലു വിളിക്കേണ്ടേ? അവസാനം എയിഡ്സ് പോലെ ഒരു സ്പെക്ട്രം മാരി വരുന്ന കാലത്ത് ഒരു പക്ഷേ? ഏയ്, അതുണ്ടാകില്ല, കാരണം സകലരും അതിനു പറ്റിയ ഒരു തൊപ്പിയും വച്ചു നടക്കാൻ സുപ്രീം കോടതി ഉത്തരവിടും. സർക്കാരിനും പോലീസിനും ഒരുപോലെ വരുമാനവുമാകും.