ഇന്നത്തെ ചിത്രം

നമ്മുടെ നാട്ടിലെ സാധാരണക്കാരുടെ നിത്യോപയോഗ സാധനങ്ങളും അവയിലെ റീസൈക്കിൾഡ് പ്ലാസ്റ്റിക്കിന്റെ ആധിക്യവും ഒരേപോലെ ഈ ചിത്രം വെളിവാക്കുന്നു. ഈ കച്ചവടക്കാരനേപ്പോലെ തന്നെ നമ്മുടെ ജീവിതവും ഒരു നിമിഷം ബാലൻസ് തെറ്റിയാൽ താഴെ.

പീലി മനോജ് കനകമലയിൽ വച്ചെടുത്തതാണ് ഈ ചിത്രം.

ദേശമീമാംസാ

ആനുകാലിക രാഷ്ട്രീയത്തിലെ തെറി

രാക്ഷസൻ

കൊടുങ്ങല്ലൂരെ തെറിപ്പാട്ട് ദൈവീകമാണ്. അതു നിരോധിക്കണമെന്നു ഭൂമാനന്ദ തീർത്ഥയും കോടതിയും പറഞ്ഞിട്ടു കാര്യമില്ല. കേൾക്കേ പറഞ്ഞില്ലെങ്കിലും രഹസ്യമായി അവരതു ചെയ്യും. അപ്പോ തീർത്ഥ എന്തു ചെയ്യും? ജപജപോ ജപജപ. അത്ര തന്നെ.

മനസ്സിൽ തെറിയുള്ളവർ ചിലപ്പോൾ അറിയാതെ അതു പറഞ്ഞുപോകും. കേൾവിക്കാരെ കണ്ട് സ്വയം മറന്നു അനുയായികൾക്ക് ആനന്ദനിർവൃതി ഉണ്ടായിക്കോട്ടെ എന്നു കരുതി നാവുപിഴച്ചു പോയതാണെന്നൊക്കെ പറയാം. പക്ഷേ കോടതി പറഞ്ഞപോലെ ശുംഭനാരെന്നൊക്കെ വൈയാകരണന്മാർക്ക് അറിഞ്ഞില്ലെങ്കിലും മലയാളികൾക്കറിയാം. 

പ്രശ്നം ദർശനത്തിന്റേതാണെന്നു രാക്ഷസൻ കരുതുന്നു. സകലർക്കും വേണ്ടി പ്രവർത്തിക്കുന്ന ആർക്കും അങ്ങനെ ആരേയും അധിക്ഷേപിക്കാൻ നാവുപൊങ്ങുകയില്ല. വർഗ്ഗവും മതവും ജാതിയുമൊക്കെ ചിന്തിക്കുന്നതു കൊണ്ടാണു മഹാവൈയാകരണന്മാർ നാവിനു പിഴപറ്റി പുഴുക്കളെ സ്മരിക്കുന്നത്. സ്മരണ തന്നെ നിരോധിക്കേണ്ട ചിത്തവൃത്തിയാണെന്ന് പതഞ്ജലി. 

മാധ്യമങ്ങൾക്ക് ആത്മപ്രസംസ അധികരിച്ചതു കൊണ്ടായിരിക്കണം ആരാരെ എങ്ങനെ കൊച്ചാക്കിയെന്നും മറ്റും തേടിപ്പിടിച്ചു റിപ്പോർട്ട് ചെയ്തത്. രജനിയോടു ചെയ്തത് നാടറിയേണ്ടതു തന്നെ. അതിൽ അഭിവ്യഞ്ജകന്റെ പുരുഷലിംഗരാഷ്ട്രീയം പ്രത്യക്ഷമാണ്. ഒരേ ജനുസ്സിൽ പെട്ടവർ പരസ്പരം നടത്തിയ തരം താണ പദപ്രയോഗങ്ങൾ അവഗണിച്ചിരുന്നെങ്കിൽ മലയാള രാഷ്ട്രീയ റിപ്പോർട്ടിംഗിനു കൂടി അല്പം അന്ത്സസു ലഭിക്കുമായിരുന്നു. ജയലക്ഷ്മി തന്റെ അന്ത്സസു പരിപാലിച്ചുവല്ലോ.

നാവിനും പേനക്കും പറ്റുന്ന കൈയബദ്ധങ്ങളെ മാപ്പുകൊണ്ടു തന്നെയാണു മാന്യരായവർ മായിച്ചു കളയുന്നത്. മാപ്പപേക്ഷ ചിരിച്ചുകൊണ്ടോ ഒരു പക്ഷേ ഒന്നു പുറത്തു തട്ടിക്കൊണ്ടോ സാരമാക്കേണ്ടാ എന്നു പറഞ്ഞു സ്വീകരിക്കാൻ കഴിയുന്നതും ബഹുമാന്യതയാണ്. 

ആർക്കും ബഹുമാന്യരാകണമെന്നില്ലെന്നു തോന്നുന്നു; വോട്ടുകിട്ടാനുള്ള വല്ല വകയും ഇതിലുണ്ടോ എന്നാണ് നോട്ടം. ബഹുമാന്യർക്കാണ് വോട്ടെന്നതു ഇവരാരും അംഗീകരിക്കുന്നില്ലെന്നു തോന്നുന്നു.

ചോദ്യമാണുത്തരം

എന്റെ മകൻ എഞ്ചിനീയറിംഗിനു പോകാനാഗ്രഹിക്കുന്നു. എനിക്കത് ഇഷ്ടമല്ല. ഞാൻ എന്തു ചെയ്യണം?  

ഷീബ

പ്രിയ ഷീബ,

ഷീബയ്ക്കു എന്തോ ഒന്നു ഇഷ്ടമല്ല, പക്ഷേ അതു ചെയ്യുന്നത് ഷീബയുമല്ല. അതാണിവിടെ യഥാർത്ഥ പ്രശ്നം. ഇനി ഷീബയുടെ മകൻ ഷീബയുടെ ഇഷ്ടപ്രകാരം ചെയ്താലോ? മകൻ ഒരു കാര്യം ചെയ്യുന്നു പക്ഷേ അതവനു ഇഷ്ടമല്ല. മറ്റൊരാൾ ചെയ്യുന്നത് ഇഷ്ടമില്ലാതാകുന്നതോ സ്വയം ചെയ്യുന്നത് ഇഷ്ടമില്ലാതകുന്നതോ ഏതാണു വലിയ ദുരന്തം? അതുകൊണ്ട് ഒന്നുകിൽ ഷീബ മകനെ അവൻ ഇഷ്ടപ്പെടുന്ന മറ്റേതെങ്കിലും കോഴ്സിനു വിടാം അല്ലെങ്കിൽ മകൻ എഞ്ചിനീയറാകുന്നത് ഇഷ്ടപ്പെട്ടു നോക്കാം. എങ്കിലും ഷീബയോ മകനോ ഇഷ്ടാനിഷ്ടങ്ങൾ തീർത്തും ഉപേക്ഷിക്കണമെന്നു പറയാനാകില്ല, പരസ്പരം തുറന്ന് സംസാരിച്ച് ഒരു തീരുമാനത്തിൽ എത്തുന്നതാണു കരണീയം. കാരണം ത്യാഗം ചിലരെ നിരാശയിലെത്തിച്ചേക്കാം.

ജീവബിന്ദു

ഭൂമിയുടെ അവകാശികൾ

ആകാശം കീഴടക്കപ്പെടുന്നു

അമീബ

കോടിക്കണക്കിനു വർഷം ആരുടേതുമല്ലാതെയോ സകലരുടേതുമായോ സങ്കല്പിക്കപ്പെട്ട ആകാശത്തിനു മേലേ ആദ്യം കുത്തക സ്ഥാപിച്ചത് നവീനരാഷ്ട്രങ്ങൾ തന്നെയായിരുന്നു. യുദ്ധകലുഷിതമായ അന്തരീക്ഷം സൃഷ്ടിച്ച് രാജ്യസുരക്ഷയെന്ന പേരിൽ അന്യരാഷ്ട്രവിമാനങ്ങളെ നിരോധിക്കുകയായിരുന്നു ആദ്യപടി. പിന്നീട് തീവ്രവാദത്തിന്റെ പേരിൽ അകവും പുറവും നോക്കാതെ സകലത്തിലും നിയന്ത്രണം വന്നു. വ്യോമാകാശ നിയന്ത്രങ്ങൾ സാധിതമായ ശേഷം വൻ രാഷ്ട്രങ്ങൾ ബഹിരാകാശം ലക്ഷ്യം വച്ചു. ഇന്നു തകർന്നു തരിപ്പണമായ റഷ്യയുടെ നേതൃത്വത്തിലുള്ള ആ മുന്നേറ്റം ഒരു വെല്ലുവിളിപോലെ അമേരിക്കൻ ഐക്യനാടുകൾ തുടർന്നു വന്നു. ഒരു ഘട്ടത്തിൽ നക്ഷത്രയുദ്ധങ്ങൾ വരെ വിഭാവനം ചെയ്ത് വൻ ഫണ്ടുകൾ വകയിരുത്തി. 

അന്തരാഷ്ട്രീയ വിനിമയ മാധ്യമമെന്ന നിലയിൽ മറ്റു രാഷ്ട്രങ്ങൾ ഡോളർ വാങ്ങിക്കൂട്ടിയപ്പോൾ യഥാർത്ഥത്തിൽ ലോകത്തിലെ ഏറ്റവും കടബാധ്യതയുള്ള രാജ്യമായാണു തീർന്നതെങ്കിലും ഒഴുകി വന്നുകൊണ്ടിരുന്ന ഫണ്ട് സ്വന്തം വരുമാനമെന്നമട്ടിൽ ഇന്ത്യയടക്കമുള്ള മറ്റേതു രാജ്യത്തേയും പോലെ ഐക്യനാടുകളും കൈകാര്യം ചെയ്തു. അലാസ്കയിലെ സ്വർണ്ണഖനികളും ലോകമെമ്പാടുമുള്ള രാജ്യങ്ങളിൽ നിന്ന് അമേരിക്കൻ കമ്പനികൾ കുഴിച്ചെടുക്കുന്ന എണ്ണയും ആയുധവ്യവസായത്തിലെ കുത്തകയും രണ്ടാം ലോകമഹായുദ്ധകാലത്തെ തുടർന്ന് വിജയിയായ ഏറ്റവും വിസ്തൃതിയുള്ള ജനാധിപത്യരാജ്യമായ അമേരിക്കൻ ഐക്യനാടുകളിലേക്കു അന്യരാജ്യങ്ങളിൽ നിന്നുള്ള ധിഷണാശാലികളുടെ തുടർച്ചയായ കുടിയേറ്റവുമൊക്കെ ലോകത്തിലെ ഏറ്റവും ശക്തമായ രാജ്യമായി തുടരാനാകുമെന്നു അതിന്റെ ഭരണാധികാരികളെ വ്യാമോഹിപ്പിച്ചു. യുദ്ധത്തിനു തൊട്ടു മുമ്പു വരെ മാന്ദ്യം ബാധിച്ചു തകർന്നടിഞ്ഞു കിടന്നവരാണു തങ്ങളെന്നവവർ മറന്നുപോയി, പുതിയ മാന്ദ്യവും തകർച്ചയും മുന്നിലെത്തും വരേക്കു മാത്രമെങ്കിലും.

ധൂർത്തിന്റേയും സാമ്പത്തിക അച്ചടക്കരാഹിത്യത്തിന്റേയും കാലം കഴിഞ്ഞെന്നു സകലരും തിരിച്ചരിഞ്ഞു തുടങ്ങിയിട്ടു വർഷം പലതായിരിക്കുന്നു. അതുകൊണ്ട് നക്ഷത്ര യുദ്ധങ്ങളും ബഹിരാകാശ പരിപാടികളും ഐക്യനാടുകൾ നിറുത്തി വച്ചിട്ടു വ്യാപാരകാര്യങ്ങളിൽ ശ്രദ്ധ കേന്ദ്രീകരിക്കാൻ തുടങ്ങിയിട്ടു കാലം കുറച്ചായി. ചൈനയാണിപ്പോൽ ഹീറോ. കൃത്രിമോപഗ്രഹങ്ങളെ മിസ്സൈൽ തൊടുത്തുവിട്ടു തകർക്കാനുള്ള സാങ്കേതികത്തികവു വിജയകരമായി ആർജ്ജിക്കുകയാണവർ. മൊത്തത്തിൽ ആകാശയുദ്ധങ്ങൾ ലാഭകരമല്ലെന്നു ഇന്ത്യക്കും പാക്കിസ്ഥാനും കൊറിയകൾക്കുമൊഴികെ സകലർക്കും മനസ്സിലായെന്നു തോന്നുന്നു.

നക്ഷത്രയുദ്ധം അവസാനിപ്പിച്ചെങ്കിലും ആകാശത്തെ കൈവിടാൻ ആർക്കും മനസ്സു വരുന്നില്ല. അതുകൊണ്ട് ആകാശം വിറ്റു കാശാക്കാൻ മത്സരിക്കുകയാണോരോ രാജ്യവും. യാതൊരു നിയന്ത്രങ്ങളുമില്ലാതെ റേഡിയോകിരണങ്ങൾകൊണ്ട് ഭൂമണ്ഡലം നിറക്കാൻ മത്സരിക്കുന്നവർ ജൈവമണ്ഡലത്തിനതുണ്ടാക്കുന്ന ആഘാതത്തെ കുറിച്ച് കുറ്റകരമായ നിശബ്ദത പാലിക്കുന്നു. സ്പെക്ട്രം, സ്പെക്ട്രം സർവത്രസ്പെക്ട്രം, നമുക്കും കിട്ടണം പണം എന്നമട്ടിൽ സ്പെക്ട്രം നമ്മുടെ നാട്ടിൽ വിറ്റു കാശാക്കിയതിൽ കാര്യമായ നഷ്ടമൊന്നും പറ്റിയിട്ടില്ലെന്നു സി.ബി.ഐ. സാക്ഷ്യപ്പെടുത്തിയിട്ടുണ്ട്. എങ്കിലും ഇതെല്ലാം നടന്നത് രാജ്യതാത്പര്യം മാത്രം കണക്കിലെടുത്താണെന്നു ആരും പറയില്ല. ഒരു മലയാളി പത്രപ്രവർത്തകനു ആരോ സൽബുദ്ധി തോന്നി യഥാസമയം വാർത്ത ചോർത്തികൊടുത്തതുകൊണ്ട് ഇന്ത്യയിൽ ഇതിത്തിരി വിവാദമായിരിക്കുന്നു. മറ്റു നാടുകളിലെ സ്ഥിതി ആരറിയുന്നു? മൊത്തത്തിൽ മതിയായ പരിസ്ഥിതി ആഘാത പഠനങ്ങളും ആരോഗ്യത്തെ ഇതെങ്ങനെ ബാധിക്കും എന്നൊന്നും ആരെങ്കിലും പഠിച്ചതായി അറിയുന്നില്ല. നേരെമറിച്ച് അവിടെയും ഇവിടെയുമായി ആകാശത്തിലെ റേഡിയോ തരംഗങ്ങളുടെ അതിപ്രസരം ഗുരുതരമായ പ്രത്യാഘാതങ്ങളുണ്ടാക്കുന്നതായി പഠനങ്ങളുണ്ടായിട്ടുമുണ്ട്. പക്ഷേ ഔദ്യോഗിക പഠനങ്ങളെ മാത്രമേ മാധ്യമങ്ങൾ ആധികാരികമായെടുക്കാവൂ എന്നു മുകളിൽ നിന്നു കല്പനയുണ്ട്. പഠനം പക്ഷേ എൻഡോസൽഫാനിലേതുപോലെ, ഉല്പാദകർക്കു പറ്റിയ ഒരാളെ കണ്ടെത്തി ചെയർമാനാക്കി വിഷം തളി നിന്നിട്ട് പത്തു വർഷമെങ്കിലുമായി എന്നുറപ്പുവരുത്തി, രോഗബാധിതരിൽ മുക്കാലേ അരയ്ക്കാലും ചത്തൊടുങ്ങി മറ്റുള്ളവർ എന്തോ യാദൃശ്ചികതകൊണ്ട് അങ്ങനെയൊക്കെ ആയതാണെന്നും അതെങ്ങനെയായെന്നു സംശയാതീതമായി തെളിയിക്കാൻ കഴിയുന്നില്ലെന്നുമൊന്നും പറയാനാകില്ല. കാരണം മനസ്സറിഞ്ഞ് ഇവരാരെങ്കിലും മൊബൈലും സ്പെക്ട്രവുമൊക്കെ കെട്ടിപ്പൂട്ടി പോകുമെന്നു കരുതാൻ യാതൊരു ന്യായവുമില്ല, ഇനി അവർ സമ്മതിച്ചാലും അമീബ സമ്മതിക്കില്ല. അമീബക്കും മൊബൈലു വിളിക്കേണ്ടേ? അവസാനം എയിഡ്സ് പോലെ ഒരു സ്പെക്ട്രം മാരി വരുന്ന കാലത്ത് ഒരു പക്ഷേ? ഏയ്, അതുണ്ടാകില്ല, കാരണം സകലരും അതിനു പറ്റിയ ഒരു തൊപ്പിയും വച്ചു നടക്കാൻ സുപ്രീം കോടതി ഉത്തരവിടും. സർക്കാരിനും പോലീസിനും ഒരുപോലെ വരുമാനവുമാകും.

മേലൂർന്യൂസിലെ സ്ഥിരം പംക്തികൾ

മേലൂർന്യൂസിന്റെ ഘടന സംബന്ധിച്ച് വിശദമായ നിർദ്ദേശങ്ങളാണ് അഭ്യുദയകാംക്ഷികൾ ഇതുവരെ സമർപ്പിച്ചിട്ടുള്ളത്. അവയിൽ പ്രധാന നിർദ്ദേശങ്ങൾ താഴെ ചേർക്കുന്നു.
മേലൂർന്യൂസിലെ സ്ഥിരം പംക്തികളായി നിർദ്ദേശിക്കപ്പെട്ട വിഷയങ്ങൾ
പേര് കൈകാര്യം ചെയ്യേണ്ട വിഷയങ്ങൾ
1. വിജ്ഞാനരംഗം : വിദ്യാഭ്യാസം, കരിയർ ഗൈഡൻസ്, തൊഴിലൊഴിവുകൾ എന്നിവ
2. ദാർശനികം : വിവിധ ദർശനങ്ങളേയും ദാർശനികരേയും സംബന്ധിച്ച കുറിപ്പുകൾ
3. സിനിമാകൊട്ടക : തെക്കേ ഇന്ത്യൻ സിനിമാ രംഗത്തെ ചൂടൻ വാർത്തകൾ
4. സമസ്തകല : ലളിതകല, ദൃശ്യകല എന്നിവ കൈകാര്യം ചെയ്യുന്നു.
5. എഴുത്തുപുര : കഥ, കവിത, ലേഖനം, നാടകം, തുടങ്ങിയ സാഹിത്യസംഭാവനകൾ
6. ജീവലോകം : പരിസ്തിതിയെ സംബന്ധിച്ച ഉത്കണ്ഠകൾ പങ്കുവക്കുന്ന ഇടം.
7. പൊതുജനാരോഗ്യം : ആരോഗ്യരംഗത്തെ ആനുകാലിക പ്രശ്നങ്ങൾ
8. പ്രതികരണവേദി : വായനക്കാരുടെ കത്തുകൾ
9. നർമവീഥി : ഫലിതം
10. സാഹിതീയം : സാഹിത്യവിമർശനം
11. ഇന്നത്തെ ചിത്രം : ഓരോ ആഴ്ചയിലേയും കലാമൂല്യവും വാർത്താമൂല്യവുമുള്ള ചിത്രം
12. കാർട്ടൂൺ : തെരഞ്ഞെടുത്ത കാർട്ടൂൺ
13. വാഹനലോകം : വാഹനവിപണന രംഗത്തെ പ്രവണതകൾ
14. സംഗീതിക : വാദ്യം, സംഗീതം ഇത്യാദി
15. നേർക്കാഴ്ച : ഇന്റർവ്യൂകൾ
16. വിത്തും കൈക്കോട്ടും : കാർഷികരംഗം
17. നേരുചർച്ചകൾ : പ്രതിമാസസെമിനാറുകളുടെ സംഗ്രഹം
18. നളപാ(ത)കം : പാചകക്കുറിപ്പുകൾ
19. ചോദ്യമാണുത്തരം : ചോദ്യോത്തരപംക്തി
20. മഹാഭാഷിതം : ഉദ്ധരണികൾ
21. പുരാവൃത്തി : ക്ലാസ്സിക് മലയാളം കൃതികളുടെ പുനഃപ്രകാശനം
22. മുഖമൊഴി : മുഖപ്രസംഗം
23. പിൻനിലാവ് : മേലൂരിന്റെ സാംസ്കാരിക പാരമ്പര്യത്തെ കുറിച്ച്
24. സ്ത്രീപർവം : വനിതാരംഗം
25. കായികകല : സ്പോർട്സ്
26. പ്രത്യക്ഷവിജ്ഞാനീയം: ശാസ്ത്രരംഗത്തെ ആധുനിക പ്രവണതകൾ
27. ഇന്നത്തെ പുസ്തകം : വായനക്കാർക്കു ഡൌൺലോഡ് ചെയ്യാനൊരു പുസ്തകം.
28. പുനർവായന : ബൂക് റിവ്യൂ
29. വിപണിനില : ധനതത്വശാസ്ത്രസമസ്യകൾ
30. ദേശമീമാംസാ : ആനുകാലിക രാഷ്ട്രീയം
31. ഭൂമിയുടെ അവകാശികൾ : ഊർജ്ജം, മണ്ണ്, ജലം, ആകാശം എന്നിവയിലെ കടന്നുകയറ്റം
32. ഫാഷൻ തരംഗം : ഫാഷൻ രംഗത്തെ പ്രവണതകൾ
33. ശില്പശാസ്ത്രം : ആർക്കിടെക്ചർ
34. ടൂറിസ്റ്റ് : വിനോദസഞ്ചാരവും യാത്രാവിവരണവും
35. വിവരാവകാശം : വിവരാകാശനിയമ പ്രകാരം ലഭിക്കുന്ന വിലപ്പെട്ട ഉത്തരങ്ങൾ
36. ഉപഭോക്തൃപ്രശ്നങ്ങൾ : ഉപഭോക്താക്കളുടെ പ്രശ്നങ്ങൾക്ക് പ്രതിവിധി
37. നിയമസഹായം : സൌജന്യനിയമോപദേശമോ അതു ലഭ്യമാക്കലോ
38. ജനകീയഭരണം : പഞ്ചായത്തുകൾ, വില്ലേജ്, കൃഷിഭവൻ, ഇലക്ട്രിസിറ്റി ആഫീസ്
39. യുവപ്രതിഭ : വളർന്നു വരുന്ന പ്രതിഭകൾക്ക് പ്രോത്സാഹനം
40. നിതാന്തജാഗ്രത : അഴിമതിക്കെതിരെ ജനകീയ പ്രതിരോധം
41. കാരുണ്യം തേടുന്നു : സഹജീവികളെ സഹായിക്കാൻ ഒരു അവസരം

ഇവയിൽ പല പേരുകളും മറ്റു പ്രസിദ്ധീകരണങ്ങളിൽ കണ്ടതായി ഓർക്കുന്നു. അതിനാൽ പംക്തികൾക്കു യുക്തമായ മറുപേരുകൾ നിർദ്ദേശിക്കാനും അവയ്ക്കു നിലവിലുള്ളതിലും കൂടുതൽ വ്യാപ്തി ആവശ്യമുള്ളപക്ഷം കൂട്ടിച്ചേരലുകൾ നിർദ്ദേശിക്കാനും കൂടുതൽ പംക്തികൾ നിർദ്ദേശിക്കാനുമുള്ള അവസരമാണിത്. അക്കാര്യത്തിൽ ഉപേക്ഷ കാട്ടരുത്. കമന്റു ചെയ്യുന്നതിൽ ഒരു ദാക്ഷിണ്യവും കാട്ടേണ്ടതുമില്ല.

എന്നാൽ വാർത്തകൾക്കു പുറമേ ഇത്രയും വിഷയങ്ങൾ കൈകാര്യം ചെയ്യാൻ വേണ്ട വളണ്ടിയർമാരുടേയും എഡിറ്റർമാരുടേയും അഡ്മിനിസ്ട്രേറ്റർമാരുടേയും കുറവ് ഒരു യാഥാർത്ഥ്യം തന്നെയാണ്. ജനകീയമായ ഒരു തലത്തിൽ നിന്നു പ്രവർത്തിക്കാനാഗ്രഹിക്കുന്നതിനാലാണ് ഇത്തരം വിഷയങ്ങൾ നാം ചർച്ച ചെയ്യുന്നതെന്നതും പ്രസക്തം തന്നെ. അതിനാൽ നിങ്ങളോരോരുത്തരും സർവാത്മനാ ഇതിന്റെ വിജയത്തിനായി സക്രിയമായി മുമ്പോട്ടു വരേണ്ടതുണ്ട്. സഹകരിക്കാനാഗ്രഹിക്കുന്നവർ ദയവായി അക്കാര്യം തുറന്നു പറയേണ്ടതുണ്ട്. എങ്കിലേ ആസൂത്രണത്തിനും മുന്നൊരുക്കതിനും അവസരം ലഭിക്കുകയുള്ളൂ. നിങ്ങൾക്കെങ്ങനെ സഹായിക്കാനാകുമെന്നു തുറന്നു പറയുന്നത് ഒരിക്കലും വിലകുറച്ചു കാണുവാനിടയാക്കുകയില്ല എന്നു മാത്രമല്ല മേലൂർ ന്യൂസിന്റെ വിജയത്തിനു അത്യന്താപേക്ഷിതവുമാണ്.

ഡിസംബറിൽ തന്നെ മാതൃകാ പോസ്റ്റുകൾ പുറത്തു വരണമെന്നു കരുതുന്നതിനാൽ സൃഷ്ടികൾ അവസാന നിമിഷത്തേക്കു ആരും കരുതിവയ്ക്കരുത്. മലയാളം പോസ്റ്റുകൾ കഴിയുന്നതും അഞലിഓൾഡ്ലിപി ഫോണ്ടിലും ഇംഗ്ലീഷ് പോസ്റ്റുകൾ കലിബ്രി ലിപിയിലും ആകുന്നതു സൌകര്യപ്രദമായിരിക്കും. മറ്റൊരറിയിപ്പുണ്ടാകും വരേക്കും jeevabindu@mail.com എന്ന ഈമെയിൽ വിലാസത്തിൽ സൃഷ്ടികൾ അയച്ചു തരിക. അഡ്മിനിസ്ട്രേറ്റീവ് പവർ ആവശ്യമായി വരുന്നവർ അവർ അതിന്റെ ആവശ്യകതയും അവർ ഏറ്റെടുക്കാനുദ്ദേശിക്കുന്ന പംക്തികളുടെ വിവരങ്ങളും കാട്ടി ഒരു കുറിപ്പുകൂടി അയക്കേണ്ടതുണ്ട്. ഓരോ രാജ്യങ്ങളിലേയും സ്ഥിരം ലേഖകരാകാനാഗ്രഹിക്കുന്നവർ അക്കാര്യവും വ്യക്തമാക്കണം.

ലിങ്കുകളുടെ കാര്യത്തിൽ കൂട്ടിച്ചേർക്കേണ്ട സൈറ്റുകൾ സംബന്ധിച്ച നിർദ്ദേശങ്ങളും ക്ഷണിക്കുന്നു. ഓർക്കുക, പ്രവർത്തിക്കുന്നവരുടേതാണീ വാർത്താപത്രിക.

മേലൂർ ന്യൂസിൽ എന്തെല്ലാം സ്ഥിരം പംക്തികൾ വേണം?

മേലൂർ ന്യൂസിൽ എന്തെല്ലാം സ്ഥിരം പംക്തികൾ വേണമെന്നു നിശ്ചയിക്കാൻ വായനക്കാർക്കുള്ള അവസരമാണിത്. നിങ്ങളുടെ വിലയേറിയ നിർദ്ദേശങ്ങൾ ക്ഷണിക്കുന്നു.

ഫോണ്ട് പ്രശ്നമുള്ളവരുടെ ശ്രദ്ധക്ക്

അഞ്ചലി ഓൽഡ് ലിപി ഫോണ്ടാണു മേലൂർ ന്യൂസിൽ ഉപയ്യൊഗിച്ചു വരുന്നത്. എങ്കിലും ഏതെങ്കിലും യൂണികോഡ് ഫോണ്ട് ഇൻസ്റ്റാൾ ചെയ്തവർക്കു ഇതു കാണാനാകുന്നതാണ്. ചില്ലക്ഷരങ്ങൾ കുഴപ്പമുണ്ടാക്കുന്ന പക്ഷം മോസില്ല ഫയർ ഫോക്സ് ബ്രൌസർ ഉപയോഗിക്കുമ്പോൾ മെച്ചപ്പെട്ട ഫലം ലഭിക്കുന്നതായി കാണുന്നുണ്ട്. ദയവായി ശ്രദ്ധിക്കുമല്ലോ?

മേലൂർ ന്യൂസിനു അഡ്മിനിസ്ട്രേറ്റർമാരേയും എഡിറ്റർമാരേയും ലേഖകരേയും ആവശ്യമുണ്ട്

മേലൂർ ന്യൂസിന്റെ അഡ്മിനിസ്ട്രേറ്റർമാരായോ എഡിറ്റർമാരായോ ലേഖകരായോ മറ്റു സഹവർത്തികളായോ പ്രവർത്തിക്കാനാഗ്രഹിക്കുന്നവർ ആദ്യപടിയായി മേലൂർ ന്യൂസിൽ അംഗമാകാൻ അപേക്ഷിക്കുന്നു. അംഗമായവരുമായി പിന്നീട് ഇമെയിൽ ടെലഫോൺ തുടങ്ങിയവ മുഖേന ബന്ധപ്പെടുന്നതാണ്. ദയവായി സഹകരിക്കുക.

ഈ വാർത്താപത്രിക പ്രയോജനപ്പെടുത്തുന്നതിനെ കുറിച്ച് ചില നിർദ്ദേശങ്ങൾ

ഈ ബ്ലോഗിന്റെ ഏറ്റവും അടിയിലായി ചില സൈറ്റുകളിലേക്കുള്ള ലിങ്കുകൾ നൽകിയിട്ടുണ്ട്. ദയവായി അവ പ്രയോജനപ്പെടുത്തുക. അവയിൽ ചിലത് താഴെ ചേർക്കുന്നു.
allnewsൽ ക്ലിക്ക് ചെയ്താൽ ഇന്ത്യയിലെ വിവിധ ഭാഷകളിലുള്ള വർത്തമാന പത്രങ്ങളുടെ പൊതു സൈറ്റായ ഇന്ത്യപ്രെസ്സ് എന്ന സൈറ്റിലാണു എത്തിച്ചേരുക. തുടർന്ന് താങ്കൾക്കാവശ്യമായ ഭാഷ തെരഞ്ഞെടുക്കുക. ആ ഭാഷയിൽ ലഭ്യമായ വർത്തമാന പത്രങ്ങളുടെ ഓൺലൈൻ പതിപ്പ് ലഭ്യമാകുന്നതാണ്. പത്രങ്ങളുടെ സാധാരണ രൂപത്തിൽ വായിക്കാനാഗ്രഹമുണ്ടെങ്കിൽ ഓരോ പത്രത്തിലേയും epaper ഓപ്ഷണിൽ ക്ലിക്ക് ചെയ്യണം. ഇന്ത്യാപ്രെസ്സിൽ ലഭ്യമല്ലാത്ത മലയാള പത്രങ്ങളിൽ വീക്ഷണം കേരളകൌമുദി മാധ്യമം എന്നിവയുടെ ലിങ്കുകൾ veekshanam keralakaumudi madhyamam എന്നിങ്ങനെ പ്രത്യേകം നൽകിയിട്ടുമുണ്ട്. thehindu hindustantimes timesofindia എന്നിവയുടെ കാര്യവും ഇപ്രകാരം തന്നെ.
ഇന്റർനെറ്റ് ന്യൂസ് സൈറ്റുകളും ബ്ലോഗുകളുടെ അഗ്രഗേറ്ററുകളുമായി googlenews malayalam-blogsheet thanimalayalam chintha cyberjalakam varamozhi malayalamblogroll thappiokka എന്നിവ നൽകിയിട്ടുണ്ട്.
പുസ്തക പ്രേമികൾക്കായി സൌജന്യമായി പുസ്തകങ്ങൾ ഡൌൺലോഡ് ചെയ്യാവുന്ന Library.nu gutenberg bookyards pdfbooks എന്നീ സൈറ്റുകളും ഒരുക്കിയിട്ടുണ്ട്.
ജോലിക്കായി ശ്രമിക്കുന്നവർക്കായി Cooperative Service Examination Board KPSC civil services UPSC എന്നീ സൈറ്റുകളുമുണ്ട്. പഠിക്കുന്നവർക്കായി Kerala University Calicut University Cochin University Kannur University M.G. University SSUS Agri. University University of Health Sciences it@school Kerala Results hscap dhse ncertട എന്നീ സൈറ്റുകളും പ്രയോജനപ്രദമായിരിക്കുമെന്നു കരുതുന്നു.
സർക്കാർ സൈറ്റുകളായ Kerala Govt. Kerala High Court Supreme Court India Govt. എന്നിവയും ഉൾപ്പെടുത്തിയിട്ടുണ്ട്.
chalakudyonline meloorpanchayat chalakudyblock എന്നിവയും പ്രയോജനപ്പെടും.
കൂടുതൽ സൈറ്റുകൾ ചേർക്കണമെങ്കിൽ അതിനുള്ള നിർദ്ദേശങ്ങളും ക്ഷണിക്കുന്നു.

സന്ദേശം

പ്രിയ സുഹൃത്തുക്കളേ,
മേലൂരിനും സമീപപ്രദേശത്തും നിന്നുള്ളവർക്ക് അവരുടെ നാട്ടിലേയും ജോലിചെയ്യുന്ന ഇടങ്ങളിലേയും വാർത്തകൾ പങ്കുവയ്ക്കുന്നതിനുള്ള ഒരു ഇടമാണിത്. ദയവായി ഇതു പ്രയോജനപ്പെടുത്തുക. ഇതിൽ പ്രസിദ്ധീകരിക്കുന്ന മാറ്ററുകൾക്ക് അതതിന്റെ രചയിതാക്കൾക്കും റിപ്പോർട്ടർമാർക്കും മാത്രമായിരിക്കും ഉത്തരവാദിത്തം. എഡിറ്റിങ് കാര്യമായിട്ടുണ്ടാകുകയില്ല. എങ്കിലും തീർച്ചയായും ഒഴിവാക്കേണ്ട സംഗതികൾ ഒഴിവാക്കിയിരിക്കും. തുടക്കത്തിൽ ആഴ്ചയിൽ ഒന്നെന്ന നിലയിൽ തുടങ്ങാനാണു ആഗ്രഹിക്കുന്നത്. കഴിയുന്നത്ര രാജ്യങ്ങളിൽ നിന്നും റിപ്പോർട്ടർമാർ ഉണ്ടാകണമെന്നാഗ്രഹിക്കുന്നു. ദയവായി താല്പര്യമുള്ള ഓരോരുത്തരും കമന്റായോ ഈമെയിലായൊ സമ്മതപത്രം തരിക. ഈ വാർത്താപത്രത്തിന്റെ ഘടനയും പ്രവർത്തനവും എങ്ങനെയാകണമെന്നു നിർദ്ദേശിക്കാൻ നിങ്ങളോരോരുത്തരോടും പ്രത്യേകം അഭ്യർത്ഥിക്കുകയും ചെയ്യുന്നു. 2012 ജനുവരി 1 ആകട്ടെ നമ്മുടെ ഔദ്യോഗിക ഉത്ഘാടന തീയതി. അതുവരെ പരീക്ഷണാടിസ്ഥാനത്തിൽ വല്ലതുമൊക്കെ ചെയ്യാം.
സസ്നേഹം
ജീവബിന്ദു