ജീവലോകം

കറവപ്പശുക്കൾ ചത്തു വീഴുന്നതെന്തുകൊണ്ട്? കേരളത്തിലെ സർക്കാർ വക ഫാംഹൌസുകളിൽ പലതിലും അത്യുല്പാദനശേഷിയുള്ള കറവപ്പശുക്കൾ കൂട്ടമായി ചത്ത വിവരങ്ങൾ പലപ്പോളും റിപ്പോർട്ട് ചെയ്യപ്പെട്ടിട്ടുണ്ട്. കുട്ടനാട്ടിൽ സർക്കാർ വിതരണം ചെയ്ത പശുക്കൾ മരിച്ചതുകൊണ്ട് കടക്കെണിയിലായ അനേകം കർഷകരുമുണ്ട്. മേലൂർ പഞ്ചായത്തിലെ ക്ഷീരകർഷകരും ഇത്തരം ഒരു തിരിച്ചടി നേരിട്ടു കൊണ്ടിരിക്കുകയാണ്. വൻ തോതിൽ പശുക്കൽ ചത്തു കൊണ്ടിരിക്കുന്ന വാർത്തകളാണു കേൾക്കുന്നത്. വിദഗ്ധർ അടിയന്തിരമായി ഇക്കാര്യത്തിൽ ഇടപെട്ടാലേ നമ്മുടെ കർഷകരും വയനാടൻ പാത പിന്തുടരാതിരിക്കൂ. പശുവിനു ഏ.സി. റൂം ഉണ്ടാക്കി കൊടുക്കണമെന്നു വിദഗ്ധർ ഉപദേശിക്കാതിരുന്നാൽ മതി.

ജനകീയ ഭരണം

വെള്ളവും വെളിച്ചവും വേയ്സ്റ്റാക്കുന്നവർ

വെള്ളവും വെളിച്ചവും ഏതൊരു പരിഷ്കൃത ജനകീയ ഭരണത്തിന്റേയും പ്രാഥമിക ചുമതലയാണ്. മേലൂർ പഞ്ചായത്തിന്റെ ചുമതലയിലുള്ള സ്ട്രീറ്റു ലൈറ്റുകൾ പലപ്പോളും കത്താറില്ല. ആവശ്യത്തിനു വോൾട്ടേജ് കാണാറില്ല ബൾബ് അടിച്ചുപോയി ആവശ്യത്തിനു ലൈന്മാന്മാരില്ല എന്നിങ്ങനെ പല കാരണങ്ങളും കെ.എസ്.ഇ.ബി.യ്ക്ക് നിരത്താൻ കാണും. ഗ്രാമപഞ്ചായത്തിനു ഉപഭോക്താവ് എന്ന നിലയിൽ ഇക്കാര്യത്തിൽ കർശന നടപടികൾ സ്വീകരിക്കാൻ കഴിയുമായിരുന്നിട്ടും അപ്രകാരം പലപ്പോളും ചെയ്തുകാണുന്നില്ല. പൊതുജനം ഇക്കാര്യത്തിൽ കൂടുതൽ മനസ്സു വയ്ക്കണം. സ്വന്തം വീടിനരികിലെ സ്ട്രീറ്റ് ലൈറ്റുകൾ കത്താതെ പോയാലും നാം പഞ്ചായത്തിനും കെ.എസ്.ഇ.ബിയ്ക്കും പരാതി നൽകണം. ഇരുപത്തിനാലു മണിക്കൂറിനകം പരാതി പരിഹരിക്കാത്തപക്ഷം രേഖാമൂലം പരാതി നൽകണം. എന്നിട്ടും കാര്യം നടന്നില്ലെങ്കിൽ മാസ്സ്പെറ്റീഷനോ നിയമപരമായ നടപടികളോ സ്വീകരിക്കണം. ഇക്കാര്യത്തിൽ ഓരോ ജനപ്രതിനിധിയുടേയും ഉദ്യോഗസ്ഥന്റേയും നടപടികൾ ജനം പ്രത്യേകം വിലയിരുത്തേണ്ടതുണ്ട്.

ജലം അമൂല്യമാണ്; അതു പാഴാക്കരുത് എന്നു സർക്കാർ നയം. പക്ഷേ വഴിവക്കിലെ ടാപ്പുകൾ പൊട്ടിയൊലിക്കുന്നത് നിരന്തരമായ കാഴ്ചയും വീഴ്ചയും. അമ്പതോ നൂറോ രൂപകൊണ്ടു ശരിയാക്കാവുന്ന പണികളാണു മിക്കവയും. ഇക്കാര്യത്തിൽ ഉപേക്ഷ കാട്ടുന്ന എഞ്ചിനീയർമാരേയും അധികാരികളെയും എന്താണു ചെയ്യേണ്ടത്? അതൊക്കെ പോട്ടെ സ്വന്തം വീടിനു മുമ്പിൽ അത്തരം ഒരു സംഭവം നടന്നാൽ അറിയിക്കേണ്ടവരെ അറിയിക്കാൻ മടി കാട്ടുന്ന രീതി നാം ഉപേക്ഷിക്കണം. ആരെയാണു അറിയിക്കേണ്ടതെന്നറിയാതെ വന്നാൽ പഞ്ചയത്ത് സെക്രട്ടറിയെയെങ്കിലും അറിയിക്കണം. അദ്ദേഹം വേണ്ടപ്പെട്ടവരെ അറിയിച്ചുകൊള്ളും.

ഇന്നത്തെ പുസ്തകം

ഹരിനാമകീർത്തനം  തുഞ്ചത്തു് എഴുത്തച്ഛൻ

തുഞ്ചത്ത് രാമാനുജൻ എഴുത്തച്ചന്റെ ആദ്യകാല കൃതികളിലൊന്നാണു ഹരിനാമ കീർത്തനം. അൻപേണമെന്മനസി എന്ന വരി മുതൽ ഓരോ ശ്ലോകവും അക്ഷരമാലാ ക്രമത്തിലാണ്. പണ്ട് കുട്ടികൾക്ക് അക്ഷരമുറപ്പിക്കാൻ ഈ കീർത്തനം ചൊല്ലിക്കൊടുക്കാറുണ്ടായിരുന്നു. 

നാരായണായ നമഃ നാരായണായ നമഃ
നാരായണായ നമഃ നാരായണായ നമഃ
നാരായണ, നരകസന്താപനാശക,ജ-
ഗന്നാഥ വിഷ്ണു ഹരി നാരായണായ നമഃ

ഓങ്കാരമായ പൊരുൾ മൂന്നായ് പിരിഞ്ഞുടനെ
ആങ്കാരമായതിനു താൻതന്നെ സാക്ഷിയതു
ബോധം വരുത്തുവതിനാളായിനിന്ന പര-
മാചാര്യരൂപ ഹരിനാരായണായ നമഃ

ഒന്നായ നിന്നയിഹ രണ്ടെന്നുകണ്ടളവി-
ലുണ്ടായൊരിണ്ടൽബത മിണ്ടാവതല്ല മമ
പണ്ടേക്കണക്കെ വരുവാൻ നിൻകൃപാവലിക-
ളുണ്ടാകയെങ്കലിഹ നാരായണായ നമഃ

ആനന്ദചിന്മയ! ഹരേ! ഗോപികാരമണ!
ഞാനെന്നഭാവമതു തോന്നായ്‌കവേണമിഹ;
തോന്നുന്നതാകിലഖിലം ഞാനിതെന്നവഴി
തോന്നേണമേ വരദ, നാരായണായ നമഃ

അർക്കനലാദി വെളിവൊക്കെ ഗ്രഹിക്കുമൊരു
കണ്ണിന്നുകണ്ണു മനമാകുന്ന കണ്ണതിനു
കണ്ണായിരുന്നപൊരുൾ താനെന്നുറയ്‌ക്കുമള-
വാനന്ദമെന്തു! ഹരിനാരായണായ നമഃ

ഹരിനാമകീർത്തനമിതുരചെയ്‌വതിന്നു ഗുരു-
വരുളാലെ ദേവകളുമരുൾചെയ്‌ക ഭൂസുരരും
നരനായ് ജനിച്ചുഭുവി മരണം ഭവിപ്പളവു-
മുരചെയ്‌വതിന്നരുൾക നാരായണായ നമഃ

ശ്രീമൂലമായ പ്രകൃതീങ്കൽ തുടങ്ങിജന-
നാന്ത്യത്തോളം പരമഹാമായതന്റെ ഗതി
ജന്മങ്ങളും പലകഴിഞ്ഞഅലുമില്ലവധി
കർമ്മത്തിനും പരമനാരായണഅയ നമഃ

ഗർഭസ്ഥനായ് ഭുവി ജനിച്ചും മരിച്ചുമുദ-
കപ്പോളപോലെ ജനനാന്ത്യേ ന നിത്യഗതി
ത്വൽഭക്തി വർദ്ധനമുദിക്കേണമെന്മനസി
നിത്യം തൊഴായ്‌വരിക നാരായണായ നമഃ

ണത്താരിൽമാനനിമണാളൻ പുരാണപുരു-
ഷൻ ഭക്തവത്സലനനന്താദിഹീനനപി
ചിത്തത്തിലച്യുത!കളിപ്പന്തലിട്ടു വിള-
യാടീടുകെന്മനസി നാരായണായ നമഃ

പച്ചക്കിളിപ്പവിഴപാൽവർ‍ണ്ണമൊത്തനിറ-
മിച്ഛിപ്പവർക്കു ഷഡാധാരം കടന്നുപരി
വിശ്വസ്ഥിതിപ്രളയസൃഷ്ടിക്കു സത്വരജ-
സ്തമോഭേദരൂപ ഹരിനാരായണായ നമഃ

തത്വത്തിനുള്ളിലുദയം ചെയ്തിരുന്നപൊരു-
ളെത്തീടുവാൻ ഗുരുപദാന്തേ ഭജിപ്പവനു
മുക്തിക്കുതക്കൊരുപദേശം തരും ജനന-
മറ്റിടുമന്നവനു നാരായണായ നമഃ

യെൻപാപമൊക്കെയറിവാൻ ചിത്രഗുപ്തനുടെ
സമ്പൂർണ്ണലിഖ്യതഗിരം കേട്ടു ധർമ്മപതി
എമ്പക്കലുള്ള ദുരിതം പാർത്തുകാണുമള-
വംഭോരുഹാക്ഷ! ഹരി നാരായണായ നമഃ

നക്ഷത്രപംക്തികളുമിന്ദുപ്രകാശവു-
മൊളിക്കും ദിവാകരനുദിച്ചങ്ങുയർന്നളവു
പക്ഷീഗണം ഗരുഡനെക്കൺറ്റു കൈതൊഴുതു
രക്ഷിക്കയെന്നടിമ നാരായണായ നമഃ

മൽപ്രാണനും പരനുമൊന്നെന്നുറപ്പവനു
തൽപ്രാണദേഹവുമനിത്യം കളത്രധനം
സ്വപ്നാദിയിൽ പലവുകണ്ടാലുണർന്നവനോ-
ടൊപ്പം ഗ്രഹിക്ക ഹരിനാരായണാ നമഃ

അൻപേണമെന്മനസി ശ്രീനീലകണ്ഠഗുരു-
മഭോരുഹാക്ഷമിതി വാഴ്‌ത്തുന്നുഞാനുമിഹ
അമ്പത്തോരക്ഷരവുമോരോന്നിതെന്മോഴിയി-
ലൻപോടുചേർക്ക ഹരിനാരായണായ നമഃ

ആദ്യക്ഷരത്തിലുളവായൊന്നിതൊക്കെയുമി-
താദ്യക്ഷരത്തിലിതടങ്ങുന്നതൗം കരുതി
ആദ്യക്ഷരാലിവയിലോരോന്നെടുത്തുപരി-
കീർത്തിപ്പതിന്നരുൾക നാരായണായ നമഃ

ഇക്കണ്ടവിശ്വമതുമിന്ദ്രാദിദേവകളു-
മർക്കേന്ദുവഹ്നികളോടൊപ്പം ത്രിമൂർത്തികളും
അഗ്രേവിരാട് പുരുഷ! നിന്മൂലമക്ഷരവു-
മോർക്കായ് വരേണാമിഹ നാരായണായ നമഃ

ഈവന്നമോഹമകലെപ്പോവതിന്നുപുന-
രിവണ്ണമിള്ളൊരുപദേശങ്ങളില്ലുലകിൽ
ജീവന്നു കൃഷ്ണഹരി ഗോവിന്ദരാമ തിരു-
നാമങ്ങളൊന്നൊഴികെ നാരായണായ നമഃ

ഉള്ളിൽ കനത്ത മദമാത്സര്യമെന്നിവക-
ളുല്ലൊരുകാലമുടനെന്നാകിലും മനസി
ചൊല്ലുന്നിതാരു തിരുനാമങ്ങളന്നവനു
നല്ലുഗതിക്കുവഴി നാരായണായ നമഃ

ഊരിന്നുവേണ്ട നിജഭാരങ്ങൾ വേണ്ടതിനു
നീരിന്നുവേണ്ട നിജദാരങ്ങൾ വേണ്ടതിനു
നാരായണാച്യുതഹരേയെന്നതിന്നൊരുവർ
നാവൊന്നേവേണ്ടു ഹരി നാരായണായ നമഃ

ഋതുവായപെണ്ണിന്നുമിരപ്പന്നുദാഹകനും
പതിതന്നുമഗ്നിയജനം ചെയ്തഭൂസുരനും
ഹരിനാമകീർത്തനമിതൊരുനാളുമാർക്കുമുട-
നരുതാത്തതല്ല ഹരിനാരായണായ നമഃ

ഋഭോഷനെന്നു ചിലർ ഭാഷിക്കിലും ചിലർ ക-
ളീപാപിയെന്നു പറയുന്നാകിലും മനസി
ആവോ നമുക്കു തിരിയായെന്നുറച്ചു തിരു-
നാമങ്ങൾ ചൊൽക ഹരിനാരായണായ നമഃ

(നു)ലുസ്മാദിചേർത്തൊരു പൊരുത്തം നിനയ്ക്കിലുമി-
തജിതന്റെ നാമഗുണമതിനിങ്ങു വേണ്ട ദൃഡം
ഒരുകോടികോടിതവ തിരുനാമമുള്ളവയി-
ലരുതാത്തതില്ല ഹരിനാരായണായ നമഃ

നു(ലൂ)കാരമാദിമുതലായിട്ടു ഞാനുമിഹ
കൈകൂപ്പിവീണുടനിരക്കുന്നു നാഥനോടു
ഏകാന്തഭക്തിയകംഏവന്നുദിപ്പതിനു
വൈകുന്നതെന്തു ഹരിനാരായണായ നമഃ

ഏകാന്ത യോഗികളിലാകാംക്ഷകൊണ്ടുപര-
മേകാന്തമെന്നവഴി പോകുന്നിതെന്മനവും
കാകൻ പറന്നു പുനരന്നങ്ങൾ പോയവഴി-
പോകുന്നപോലെ ഹരിനാരായണായ നമഃ

ഐയ്യഞ്ചുമഞ്ചുമുടനയ്യാറുമെട്ടുമുട-
നൗവണ്ണമെട്ടുമുടനെൺമൂന്നുമേഴുമഥ
ചൊവ്വോടൊരഞ്ചുമപിരൺറ്റൊന്നു തത്വമതിൽ
മേവുന്ന നാഥ ജയ നാരായണായ നമഃ

ഓതുന്ന ഗീതകളിതെല്ലമിതെന്നപൊരു-
ളേതെന്നു കാണ്മതിന്നു പോരാമനോബലവും
ഏതെങ്കിലും കിമപി കാരുണ്യമിന്നുതവ
സാധിക്കവേണ്ടു ഹരി നാരായണായ നമഃ

ഔദുംബരത്തിൽ മശകത്തിന്നു തോന്നുമതിൽ
മീതേകദാപി സുഖമില്ലെന്നുതത്പരിചു
ചേതൊവിമോഹിനി മയക്കായ്‌ക നായതവ
ദേഹോഹമെന്നിവയിൽ നാരായണായ നമഃ

അംഭോജസംഭവനുമൻപൊടുനീന്തിബത
വന്മോഹവാരിധിയിലെന്നേടമോർത്തു മമ
വൻപേടിപാരമിവനൻപേടാടായ്‌വതിന്നു
മുൻപേ തോഴാമടികൾ നാരായണായ നമഃ

അപ്പാശവും വടിയുമായ്ക്കൊണ്ടജാമിളനെ
മുല്പാടുചെന്നു കയറിട്ടൊരു കിങ്കരനെ
പിൽപാടുചെന്നഥതറ്റുത്തോരുനാല്വരെയു-
മപ്പോലെനൗമി ഹരിനാരായണായ നമഃ

കഷ്ടം! ഭവാനെയൊരുപാണ്ഡ്യൻ ഭജിച്ചളവ-
ഗസ്ത്യേന നീ ബത! ശപിപ്പിച്ചതെന്തിനിഹ
നക്രേണ കാൽക്കഥ കടിപ്പിച്ചന്തിനിതു-
മോർക്കാവതല്ല ഹരിനാരായണായ നമഃ

ഘർമ്മാതപം കുളിർനിലാവെന്നു തമ്പിയൊടു
ചെമ്മേ പറഞ്ഞു നിജപത്നീം പിരിഞ്ഞളവു
തന്നെതിരഞ്ഞുമറുകിച്ചാമൃഗാക്ഷികളെ
വൃന്ദാവനത്തിലഥ നാരായണായ നമഃ

ങാനം കണക്കെയുടനഞ്ചക്ഷരങ്ങളുടെ
ഊനം വരുത്തിയൊരുനക്തഞ്ചരിക്കു ബത!
കൂനോരു ദാസിയെ മനോജ്ഞാഗിയാക്കിയയതു-
മൊന്നല്ലെയാളു ഹരി നാരായണായ നമഃ

ചമ്മട്ടിപൂണ്ടുകടിഞ്ഞാണും മുറുക്കിയുട-
നിന്ദ്രാത്മജന്നുയുധി തേർപൂട്ടിനിന്നുബത!
ചെമ്മേ മറഞ്ഞൊരുശരം കൊണ്ടുകൊന്നതുമൊ-
രിന്ദ്രാത്മജന്നെ ഹരി നാരായണായ നമഃ

ഛന്നത്വമാർന്നകനൽപോലെ നിറഞ്ഞുലകിൽ
ചിന്നുന്നനിന്മഹിമയാർക്കും തിരിക്കരുത്
അന്നന്നുകണ്ടതിനെ വാഴ്ത്തുന്നു മമുനിക-
ളെന്നത്രെ തോന്നി ഹരിനാരായണായ നമ:

ജന്തുക്കൾ വിലസീടുന്ന നിന്നുടയ
ബന്ധം വിടാതെ പരിപൂർണ്ണാത്മജനാസതതം
തന്തൗ മണിപ്രവാളകരഭേദങ്ങൾപോലെ പര-
മെന്തെന്തു ജാതമിഹ നാരായണായ നമഃ

ത്സങ്കാരനാദമിവയീഗീന്ദ്രനരുള്ളിലുമി-
തോന്നുന്നഗീതികളിലും പാല്പയോധിയിലും
ആകാശവീഥിയിലുമൊന്നായ് നിറഞ്ഞരുളു-
മാനന്ദരൂപി! ഹരിനാരായണായ നമഃ

ഞാനെന്നുമീശ്വരനിതെന്നും വളർന്നളവു
ജ്ഞാനദ്വയങ്ങൾ പലതുണ്ടായതിന്നുമിഹ
മോഹം നിമിത്തമതുപോകും പ്രകാരമപി
ചേതസ്സിലാക മമ നാരായണായ നമഃ

ടങ്കംകുരംഗവുമെടുത്തിട്ടു പതിയുടൽ
ശംഖം രഥാംഗവുമെടുത്തിട്ടു പാതിയുടൽ
ഏകാക്ഷരം തവഹി രൂപം നിനപ്പവനു
പോകുന്നുമോഹമതു നാരായണായ നമഃ

ഠായങ്ങൾ ഗീതമിവനാദപ്രയോഗമുട-
നേകശ്രുതീങ്കലൊരുമിക്കുന്നപോലെ പരം
ഏകാക്ഷരത്തിലിതടങ്ങുന്നു സർവ്വവുമി-
താകാശസൂക്ഷ്മതനു നാരായണായ നമഃ

ഡംഭാദിദോഷമുടനെട്ടും കളഞ്ഞു ഹൃദി-
മുമ്പേനിജാസനമുറച്ചേകനഅഡിയുടെ
കമ്പം കളഞ്ഞു നിലയാറും കടപ്പതിന്നു
തുമ്പങ്ങൾ തീർക്ക ഹരിനാരായണായ നമഃ

ഢക്കാമൃദംഗതുടിതഅളങ്ങൾ കേട്ടനുഭ-
വിക്കാമിതിന്നിലയിലിന്നേടമോർത്തു മമ
പാർക്കുന്നതല്ലമനമാളാനബദ്ധകരി-
തീൻകണ്ടപോലെ ഹരിനാരായണായ നമഃ

ണത്വംവരും പരിചു കർമ്മവ്യാപായമിഹ
മദ്ധേഭവിക്കിലുമതില്ലെങ്കിലും കിമപി
തത്വാദിയില്പരമുദിച്ചോരുബോധമനു-
ചിത്തേവരേണ്ടതിഹ നാരായണായ നമഃ

തത്വാർത്ഥമിത്ഥമഖിലത്തിന്നുമുണ്ടുബത!
സബ്ദങ്ങളുള്ളിൽ വിലസീടുന്നതിന്നടിയിൽ
മുക്തിക്കുകാരണമിതേശബ്ദമെന്നുതവ
വാക്യങ്ങൾതന്നെ ഹരിനാരായണായ നമഃ

ഥല്ലിന്നു മീതെ പരമില്ലെന്നുമോർത്തുമുട-
നെല്ലാരോടും കുതറിവാപേശിയും സപദി
തള്ളിപ്പുറപ്പെടുമഹംബുദ്ധികൊണ്ടു ബത!
കൊല്ലുന്നു നീ ചിലരെ നാരായണായ നമഃ

ദംഭായ വന്മരമതിന്നുള്ളിൽ നിന്നും ചില
കൊമ്പും തളിർത്തവധിയില്ലാത്ത കായ്‌കനികൾ
അൻപേറിയത്തരുവിൽ വാഴായ്‌വതിന്നുഗതി
നിൻ പാദഭക്തി ഹരി നാരായണായ നമഃ

ധന്യോഹമെന്നുമതി മന്യോഹമെന്നുമതി
പുണ്യങ്ങൾ ചെയ്ത പുരുഷൻ ഞാനിതെന്നു മതി
ഒന്നല്ലകാൺകൊരു കൊടുങ്കാടുദന്തിമയ-
മൊന്നിച്ചു കൂറ്റിയതു നാരായണായ നമഃ

നന്നായി ഗതിക്കൊരു സഹസ്രാരധാരയില
തന്നീറ്റിൽ നിങ്കരുണ വന്മാരി പെയ്‌തുപുനർ
മുന്നമ്മുളച്ചമുളഭക്തിക്കുവാഴ്‌ത്തുവതു-
മിന്നേ കൃപാനിലയ നാരായണായ നമ:

പലതുപറഞ്ഞു പകൽ കളയുന്നനാവുതവ
തിരുനാമകീർത്തനമിതറ്ഋഇനഅയ്‌ വരേണമിഹ
കലിയായ കാലമിതിലതുകൊണ്ടു മോക്ഷഗതി
എളുതെന്നുകേൾപ്പു ഹരിനാരായണായ നമഃ

ഫലമില്ലാതെ മമ വശമൊക്കലാ ജഗതി
മലമൂത്രമായതടി പലനാളിരുത്തിയുടൻ
അളവില്ലാതെവെളിവകമേയുദിപ്പതിന്നു
കളയായ്‌കകാലമിനി നാരായണായ നമഃ

ബന്ധുക്കളർത്ഥഗൃഹപുത്രാദിജാലമതിൽ
ബന്ധിച്ചവന്നുലകിൽ നിന്തത്വമോർക്കിലുമ-
തന്ധന്നു കാട്ടിയൊരു കണ്ണാടിപോലെ വരു-
മെന്നാക്കിടൊല്ല ഹരിനാരായണായ നമഃ

ഭക്ഷിപ്പതിന്നു ഗുഹപോലെ പിളർന്നുമുഖ-
മയ്യോകൃതാന്തനിഹ പിമ്പേ നടന്നു മമ
എത്തുന്നുദർദുരമുരത്തോടെ പിമ്പേയൊരു
സർപ്പം കണക്കെ ഹരിനാരായണായ നമഃ

മന്നിങ്കൽ വന്നിഹ പിറന്നന്നുതൊട്ടു പുന-
രെന്തെന്നു വാങ്മനസുദേഹങ്ങൾ ചെയ്‌തതതു
എന്തിന്നി മേലിലതുമെല്ലാമെനിക്കു ഹൃദി-
സന്തോഷമായ്‌ വരിക നാരായണായ നമഃ

യാതൊന്നു കണ്ടതതു നാരായണപ്രതിമ
യാതൊന്നു കേൾപ്പതതു നാരായണശ്രുതികൾ
യാതൊന്നു ചെയ്‌വതതു നാരായണാർച്ചണകൾ
യാതൊന്നതൊക്കെ ഹരിനാരായണായ നമഃ

രവികോടി തുല്യമൊരു ചക്രം കരത്തിലിഹ
ഫണിരാജനെപ്പൊഴുമിരിപ്പാൻ, കിടപ്പതിനും
അണിയുന്നതൊക്കെ വനമാലാദികൗസ്തുഭവു-
മകമേ ഭവിപ്പതിനു നാരായണായ നമഃ

ലക്ഷം പ്രകാരമൊടു സൃഷ്ടിപ്പതിന്നുമതു
രക്ഷിപ്പതിന്നുമതു ശിക്ഷിപ്പതിന്നുമിഹ
വിക്ഷേപമാവരണമീരണ്ടുശക്തികള-
തിങ്കേന്നുദിച്ചവകൾ നാരായണായ നമഃ

വദനം നമുക്കു ശിഖി വസനങ്ങൾ സന്ധ്യകളു-
മുദരം നമുക്കു ദധിയുലകേഴുരണ്ടുമിഹ
ഭുവനം നമുക്കു ശവനേത്രങ്ങൾ രാത്രിപക-
ലകമേ ഭവിപ്പതിനു നാരായണായ നമഃ

ശക്തിക്കു തക്ക വഴിയിത്ഥം ഭജിപ്പവനു
ഭക്ത്യാവിദേഹദൃഢവിശ്വാസമോടുമഥ
ഭക്ത്യാകടന്നു തവ തൃക്കാൽപിടിപ്പതിന-
യയ്‌ക്കുന്നതെന്നു ഹരിനാരായണായ നമഃ

ഷഡൈരികൾക്കു വിളയാട്ടത്തിനാക്കരുതു
ചിത്താംബുജം മമ തവാസ്ഥാനരംഗമിതു
തത്രാപി നിത്യവുമൊരിക്കാലിരുന്നരുൾക
സത്യസവരൂപ1 ഹരി നാരായണായ നമഃ

സത്യം വദാമി മമ ഭൃത്യാദിവർഗ്ഗമതു-
മർത്ഥം കളത്രഗൃഹ പുത്രാദിജാലമതു-
മൊക്ക്ര്ത്വദർപ്പണമതാക്കീട്ടു ഞാനുമിഹ
തൃക്കാൽക്കൽ വീണുഹരി നാരായണായ നമഃ

ഹരനും വിരിഞ്ചനുമിതമരാധിനായകനു-
മറിയുന്നതില്ല തവ മറിമായതന്മഹിമ
അറിവായ്‌ മുതൽക്കരളിലൊരുപോലെ നിന്നരുളും
പരജീവനിൽതെളിക നാരായണായ നമ:

ളത്യം കലർന്നിതു ലകാരത്തിനപ്പരിചു
തത്വം നിനക്കിലൊരു ജീവത്വമുള്ളുതവ
കത്തുന്നപൊന്മണിവിളക്കെന്നപോലെ ഹൃദി
നിൽക്കുന്നനാഥ നരിനാരായണായ നമഃ

ക്ഷരിയായൊരക്ഷരമതിങ്കേന്നൂദിച്ചതിതു
ലിപിയേഴുമക്ഷരമിതെന്നങ്ങുരപ്പു ജനം
അറിയാവതല്ലതവപരമാക്ഷരസ്യപ്പൊരുൾ
അറിയാറുമായ്‌ വരിക നാരായണായ നമ:

കരുണാപയോധി മമ ഗുരുനാഥനിസ്തുതിയെ
വിരവോടുപാർത്തു പിഴവഴിപോലെ തീർത്തരുൾക
ദുരിതാബ്ധിതൻ നടുവിൽ മറിയുന്നവർക്കു പര-
മൊരു പോതമായ് വരിക നാരായണായ നമഃ

മദമാത്സരാദികൾ മനസ്സിൽ തൊടാതെ ജന-
മിതുകൊണ്ടു വാഴ്‌തുക നമുക്കും ഗതിക്കുവഴി
ഇതു കേൾക്കതാനിതൊരു മൊഴിതാൻ പഠിപ്പവനും
പതിയാ ഭവാംബുധിയിൽ നാരായണായ നമ:

കാരുണ്യം തേടുന്നു

അമൃതയുടെ ഓപ്പറേഷൻ വിജയകരം

ചികിത്സ തുടരുന്നു.

അടിച്ചിലിയിലെ പഴവിള പ്രദീപിന്റെ മകൾ രണ്ടു വയസ്സുകാരി അമൃതയുടെ ഹൃദയശസ്ത്രക്രിയ വിജയമായി. തിരുവനന്തപുരം ശ്രീചിത്ര മെഡിക്കൽ സെന്ററിലായിരുന്നു ശസ്ത്രക്രിയ. അമൃതയെ ഡിസ്ചാർജ്ജ് ചെയ്തിട്ടുണ്ട്. എങ്കിലും ചികിത്സ തുടരേണ്ടതുണ്ട്. സുമനസ്സുകളുടെ സഹകരണം കൊണ്ടാണു അമൃതയുടെ ഓപ്പറേഷനു വേണ്ട ധനം സമാഹരിക്കാനായത്. ഇക്കാര്യത്തിൽ സഹകരിച്ച എല്ലാവരുടെ കാരുണ്യത്തിനും സഹകരണത്തിനും പ്രദീപും കുടുംബവും നന്മ പുരുഷ സ്വയം സഹായ സംഘവും അകൈതവമായ നന്ദി അറിയിച്ചിട്ടുണ്ട്. തുടർന്നും അമൃതയുടെ ചികിത്സയ്ക്കായി സഹകരണം വേണ്ടി വന്നേക്കുമെന്നാണറിയുന്നത്.

ഇന്നത്തെ ചിത്രം

നമ്മുടെ നാട്ടിലെ സാധാരണക്കാരുടെ നിത്യോപയോഗ സാധനങ്ങളും അവയിലെ റീസൈക്കിൾഡ് പ്ലാസ്റ്റിക്കിന്റെ ആധിക്യവും ഒരേപോലെ ഈ ചിത്രം വെളിവാക്കുന്നു. ഈ കച്ചവടക്കാരനേപ്പോലെ തന്നെ നമ്മുടെ ജീവിതവും ഒരു നിമിഷം ബാലൻസ് തെറ്റിയാൽ താഴെ.

പീലി മനോജ് കനകമലയിൽ വച്ചെടുത്തതാണ് ഈ ചിത്രം.

ദേശമീമാംസാ

ആനുകാലിക രാഷ്ട്രീയത്തിലെ തെറി

രാക്ഷസൻ

കൊടുങ്ങല്ലൂരെ തെറിപ്പാട്ട് ദൈവീകമാണ്. അതു നിരോധിക്കണമെന്നു ഭൂമാനന്ദ തീർത്ഥയും കോടതിയും പറഞ്ഞിട്ടു കാര്യമില്ല. കേൾക്കേ പറഞ്ഞില്ലെങ്കിലും രഹസ്യമായി അവരതു ചെയ്യും. അപ്പോ തീർത്ഥ എന്തു ചെയ്യും? ജപജപോ ജപജപ. അത്ര തന്നെ.

മനസ്സിൽ തെറിയുള്ളവർ ചിലപ്പോൾ അറിയാതെ അതു പറഞ്ഞുപോകും. കേൾവിക്കാരെ കണ്ട് സ്വയം മറന്നു അനുയായികൾക്ക് ആനന്ദനിർവൃതി ഉണ്ടായിക്കോട്ടെ എന്നു കരുതി നാവുപിഴച്ചു പോയതാണെന്നൊക്കെ പറയാം. പക്ഷേ കോടതി പറഞ്ഞപോലെ ശുംഭനാരെന്നൊക്കെ വൈയാകരണന്മാർക്ക് അറിഞ്ഞില്ലെങ്കിലും മലയാളികൾക്കറിയാം. 

പ്രശ്നം ദർശനത്തിന്റേതാണെന്നു രാക്ഷസൻ കരുതുന്നു. സകലർക്കും വേണ്ടി പ്രവർത്തിക്കുന്ന ആർക്കും അങ്ങനെ ആരേയും അധിക്ഷേപിക്കാൻ നാവുപൊങ്ങുകയില്ല. വർഗ്ഗവും മതവും ജാതിയുമൊക്കെ ചിന്തിക്കുന്നതു കൊണ്ടാണു മഹാവൈയാകരണന്മാർ നാവിനു പിഴപറ്റി പുഴുക്കളെ സ്മരിക്കുന്നത്. സ്മരണ തന്നെ നിരോധിക്കേണ്ട ചിത്തവൃത്തിയാണെന്ന് പതഞ്ജലി. 

മാധ്യമങ്ങൾക്ക് ആത്മപ്രസംസ അധികരിച്ചതു കൊണ്ടായിരിക്കണം ആരാരെ എങ്ങനെ കൊച്ചാക്കിയെന്നും മറ്റും തേടിപ്പിടിച്ചു റിപ്പോർട്ട് ചെയ്തത്. രജനിയോടു ചെയ്തത് നാടറിയേണ്ടതു തന്നെ. അതിൽ അഭിവ്യഞ്ജകന്റെ പുരുഷലിംഗരാഷ്ട്രീയം പ്രത്യക്ഷമാണ്. ഒരേ ജനുസ്സിൽ പെട്ടവർ പരസ്പരം നടത്തിയ തരം താണ പദപ്രയോഗങ്ങൾ അവഗണിച്ചിരുന്നെങ്കിൽ മലയാള രാഷ്ട്രീയ റിപ്പോർട്ടിംഗിനു കൂടി അല്പം അന്ത്സസു ലഭിക്കുമായിരുന്നു. ജയലക്ഷ്മി തന്റെ അന്ത്സസു പരിപാലിച്ചുവല്ലോ.

നാവിനും പേനക്കും പറ്റുന്ന കൈയബദ്ധങ്ങളെ മാപ്പുകൊണ്ടു തന്നെയാണു മാന്യരായവർ മായിച്ചു കളയുന്നത്. മാപ്പപേക്ഷ ചിരിച്ചുകൊണ്ടോ ഒരു പക്ഷേ ഒന്നു പുറത്തു തട്ടിക്കൊണ്ടോ സാരമാക്കേണ്ടാ എന്നു പറഞ്ഞു സ്വീകരിക്കാൻ കഴിയുന്നതും ബഹുമാന്യതയാണ്. 

ആർക്കും ബഹുമാന്യരാകണമെന്നില്ലെന്നു തോന്നുന്നു; വോട്ടുകിട്ടാനുള്ള വല്ല വകയും ഇതിലുണ്ടോ എന്നാണ് നോട്ടം. ബഹുമാന്യർക്കാണ് വോട്ടെന്നതു ഇവരാരും അംഗീകരിക്കുന്നില്ലെന്നു തോന്നുന്നു.

ചോദ്യമാണുത്തരം

എന്റെ മകൻ എഞ്ചിനീയറിംഗിനു പോകാനാഗ്രഹിക്കുന്നു. എനിക്കത് ഇഷ്ടമല്ല. ഞാൻ എന്തു ചെയ്യണം?  

ഷീബ

പ്രിയ ഷീബ,

ഷീബയ്ക്കു എന്തോ ഒന്നു ഇഷ്ടമല്ല, പക്ഷേ അതു ചെയ്യുന്നത് ഷീബയുമല്ല. അതാണിവിടെ യഥാർത്ഥ പ്രശ്നം. ഇനി ഷീബയുടെ മകൻ ഷീബയുടെ ഇഷ്ടപ്രകാരം ചെയ്താലോ? മകൻ ഒരു കാര്യം ചെയ്യുന്നു പക്ഷേ അതവനു ഇഷ്ടമല്ല. മറ്റൊരാൾ ചെയ്യുന്നത് ഇഷ്ടമില്ലാതാകുന്നതോ സ്വയം ചെയ്യുന്നത് ഇഷ്ടമില്ലാതകുന്നതോ ഏതാണു വലിയ ദുരന്തം? അതുകൊണ്ട് ഒന്നുകിൽ ഷീബ മകനെ അവൻ ഇഷ്ടപ്പെടുന്ന മറ്റേതെങ്കിലും കോഴ്സിനു വിടാം അല്ലെങ്കിൽ മകൻ എഞ്ചിനീയറാകുന്നത് ഇഷ്ടപ്പെട്ടു നോക്കാം. എങ്കിലും ഷീബയോ മകനോ ഇഷ്ടാനിഷ്ടങ്ങൾ തീർത്തും ഉപേക്ഷിക്കണമെന്നു പറയാനാകില്ല, പരസ്പരം തുറന്ന് സംസാരിച്ച് ഒരു തീരുമാനത്തിൽ എത്തുന്നതാണു കരണീയം. കാരണം ത്യാഗം ചിലരെ നിരാശയിലെത്തിച്ചേക്കാം.

ജീവബിന്ദു

ഭൂമിയുടെ അവകാശികൾ

ആകാശം കീഴടക്കപ്പെടുന്നു

അമീബ

കോടിക്കണക്കിനു വർഷം ആരുടേതുമല്ലാതെയോ സകലരുടേതുമായോ സങ്കല്പിക്കപ്പെട്ട ആകാശത്തിനു മേലേ ആദ്യം കുത്തക സ്ഥാപിച്ചത് നവീനരാഷ്ട്രങ്ങൾ തന്നെയായിരുന്നു. യുദ്ധകലുഷിതമായ അന്തരീക്ഷം സൃഷ്ടിച്ച് രാജ്യസുരക്ഷയെന്ന പേരിൽ അന്യരാഷ്ട്രവിമാനങ്ങളെ നിരോധിക്കുകയായിരുന്നു ആദ്യപടി. പിന്നീട് തീവ്രവാദത്തിന്റെ പേരിൽ അകവും പുറവും നോക്കാതെ സകലത്തിലും നിയന്ത്രണം വന്നു. വ്യോമാകാശ നിയന്ത്രങ്ങൾ സാധിതമായ ശേഷം വൻ രാഷ്ട്രങ്ങൾ ബഹിരാകാശം ലക്ഷ്യം വച്ചു. ഇന്നു തകർന്നു തരിപ്പണമായ റഷ്യയുടെ നേതൃത്വത്തിലുള്ള ആ മുന്നേറ്റം ഒരു വെല്ലുവിളിപോലെ അമേരിക്കൻ ഐക്യനാടുകൾ തുടർന്നു വന്നു. ഒരു ഘട്ടത്തിൽ നക്ഷത്രയുദ്ധങ്ങൾ വരെ വിഭാവനം ചെയ്ത് വൻ ഫണ്ടുകൾ വകയിരുത്തി. 

അന്തരാഷ്ട്രീയ വിനിമയ മാധ്യമമെന്ന നിലയിൽ മറ്റു രാഷ്ട്രങ്ങൾ ഡോളർ വാങ്ങിക്കൂട്ടിയപ്പോൾ യഥാർത്ഥത്തിൽ ലോകത്തിലെ ഏറ്റവും കടബാധ്യതയുള്ള രാജ്യമായാണു തീർന്നതെങ്കിലും ഒഴുകി വന്നുകൊണ്ടിരുന്ന ഫണ്ട് സ്വന്തം വരുമാനമെന്നമട്ടിൽ ഇന്ത്യയടക്കമുള്ള മറ്റേതു രാജ്യത്തേയും പോലെ ഐക്യനാടുകളും കൈകാര്യം ചെയ്തു. അലാസ്കയിലെ സ്വർണ്ണഖനികളും ലോകമെമ്പാടുമുള്ള രാജ്യങ്ങളിൽ നിന്ന് അമേരിക്കൻ കമ്പനികൾ കുഴിച്ചെടുക്കുന്ന എണ്ണയും ആയുധവ്യവസായത്തിലെ കുത്തകയും രണ്ടാം ലോകമഹായുദ്ധകാലത്തെ തുടർന്ന് വിജയിയായ ഏറ്റവും വിസ്തൃതിയുള്ള ജനാധിപത്യരാജ്യമായ അമേരിക്കൻ ഐക്യനാടുകളിലേക്കു അന്യരാജ്യങ്ങളിൽ നിന്നുള്ള ധിഷണാശാലികളുടെ തുടർച്ചയായ കുടിയേറ്റവുമൊക്കെ ലോകത്തിലെ ഏറ്റവും ശക്തമായ രാജ്യമായി തുടരാനാകുമെന്നു അതിന്റെ ഭരണാധികാരികളെ വ്യാമോഹിപ്പിച്ചു. യുദ്ധത്തിനു തൊട്ടു മുമ്പു വരെ മാന്ദ്യം ബാധിച്ചു തകർന്നടിഞ്ഞു കിടന്നവരാണു തങ്ങളെന്നവവർ മറന്നുപോയി, പുതിയ മാന്ദ്യവും തകർച്ചയും മുന്നിലെത്തും വരേക്കു മാത്രമെങ്കിലും.

ധൂർത്തിന്റേയും സാമ്പത്തിക അച്ചടക്കരാഹിത്യത്തിന്റേയും കാലം കഴിഞ്ഞെന്നു സകലരും തിരിച്ചരിഞ്ഞു തുടങ്ങിയിട്ടു വർഷം പലതായിരിക്കുന്നു. അതുകൊണ്ട് നക്ഷത്ര യുദ്ധങ്ങളും ബഹിരാകാശ പരിപാടികളും ഐക്യനാടുകൾ നിറുത്തി വച്ചിട്ടു വ്യാപാരകാര്യങ്ങളിൽ ശ്രദ്ധ കേന്ദ്രീകരിക്കാൻ തുടങ്ങിയിട്ടു കാലം കുറച്ചായി. ചൈനയാണിപ്പോൽ ഹീറോ. കൃത്രിമോപഗ്രഹങ്ങളെ മിസ്സൈൽ തൊടുത്തുവിട്ടു തകർക്കാനുള്ള സാങ്കേതികത്തികവു വിജയകരമായി ആർജ്ജിക്കുകയാണവർ. മൊത്തത്തിൽ ആകാശയുദ്ധങ്ങൾ ലാഭകരമല്ലെന്നു ഇന്ത്യക്കും പാക്കിസ്ഥാനും കൊറിയകൾക്കുമൊഴികെ സകലർക്കും മനസ്സിലായെന്നു തോന്നുന്നു.

നക്ഷത്രയുദ്ധം അവസാനിപ്പിച്ചെങ്കിലും ആകാശത്തെ കൈവിടാൻ ആർക്കും മനസ്സു വരുന്നില്ല. അതുകൊണ്ട് ആകാശം വിറ്റു കാശാക്കാൻ മത്സരിക്കുകയാണോരോ രാജ്യവും. യാതൊരു നിയന്ത്രങ്ങളുമില്ലാതെ റേഡിയോകിരണങ്ങൾകൊണ്ട് ഭൂമണ്ഡലം നിറക്കാൻ മത്സരിക്കുന്നവർ ജൈവമണ്ഡലത്തിനതുണ്ടാക്കുന്ന ആഘാതത്തെ കുറിച്ച് കുറ്റകരമായ നിശബ്ദത പാലിക്കുന്നു. സ്പെക്ട്രം, സ്പെക്ട്രം സർവത്രസ്പെക്ട്രം, നമുക്കും കിട്ടണം പണം എന്നമട്ടിൽ സ്പെക്ട്രം നമ്മുടെ നാട്ടിൽ വിറ്റു കാശാക്കിയതിൽ കാര്യമായ നഷ്ടമൊന്നും പറ്റിയിട്ടില്ലെന്നു സി.ബി.ഐ. സാക്ഷ്യപ്പെടുത്തിയിട്ടുണ്ട്. എങ്കിലും ഇതെല്ലാം നടന്നത് രാജ്യതാത്പര്യം മാത്രം കണക്കിലെടുത്താണെന്നു ആരും പറയില്ല. ഒരു മലയാളി പത്രപ്രവർത്തകനു ആരോ സൽബുദ്ധി തോന്നി യഥാസമയം വാർത്ത ചോർത്തികൊടുത്തതുകൊണ്ട് ഇന്ത്യയിൽ ഇതിത്തിരി വിവാദമായിരിക്കുന്നു. മറ്റു നാടുകളിലെ സ്ഥിതി ആരറിയുന്നു? മൊത്തത്തിൽ മതിയായ പരിസ്ഥിതി ആഘാത പഠനങ്ങളും ആരോഗ്യത്തെ ഇതെങ്ങനെ ബാധിക്കും എന്നൊന്നും ആരെങ്കിലും പഠിച്ചതായി അറിയുന്നില്ല. നേരെമറിച്ച് അവിടെയും ഇവിടെയുമായി ആകാശത്തിലെ റേഡിയോ തരംഗങ്ങളുടെ അതിപ്രസരം ഗുരുതരമായ പ്രത്യാഘാതങ്ങളുണ്ടാക്കുന്നതായി പഠനങ്ങളുണ്ടായിട്ടുമുണ്ട്. പക്ഷേ ഔദ്യോഗിക പഠനങ്ങളെ മാത്രമേ മാധ്യമങ്ങൾ ആധികാരികമായെടുക്കാവൂ എന്നു മുകളിൽ നിന്നു കല്പനയുണ്ട്. പഠനം പക്ഷേ എൻഡോസൽഫാനിലേതുപോലെ, ഉല്പാദകർക്കു പറ്റിയ ഒരാളെ കണ്ടെത്തി ചെയർമാനാക്കി വിഷം തളി നിന്നിട്ട് പത്തു വർഷമെങ്കിലുമായി എന്നുറപ്പുവരുത്തി, രോഗബാധിതരിൽ മുക്കാലേ അരയ്ക്കാലും ചത്തൊടുങ്ങി മറ്റുള്ളവർ എന്തോ യാദൃശ്ചികതകൊണ്ട് അങ്ങനെയൊക്കെ ആയതാണെന്നും അതെങ്ങനെയായെന്നു സംശയാതീതമായി തെളിയിക്കാൻ കഴിയുന്നില്ലെന്നുമൊന്നും പറയാനാകില്ല. കാരണം മനസ്സറിഞ്ഞ് ഇവരാരെങ്കിലും മൊബൈലും സ്പെക്ട്രവുമൊക്കെ കെട്ടിപ്പൂട്ടി പോകുമെന്നു കരുതാൻ യാതൊരു ന്യായവുമില്ല, ഇനി അവർ സമ്മതിച്ചാലും അമീബ സമ്മതിക്കില്ല. അമീബക്കും മൊബൈലു വിളിക്കേണ്ടേ? അവസാനം എയിഡ്സ് പോലെ ഒരു സ്പെക്ട്രം മാരി വരുന്ന കാലത്ത് ഒരു പക്ഷേ? ഏയ്, അതുണ്ടാകില്ല, കാരണം സകലരും അതിനു പറ്റിയ ഒരു തൊപ്പിയും വച്ചു നടക്കാൻ സുപ്രീം കോടതി ഉത്തരവിടും. സർക്കാരിനും പോലീസിനും ഒരുപോലെ വരുമാനവുമാകും.